Mætir öldungnum sem breytti lífi hans

Valur Páll Eiríksson skrifar 22. desember 2025 11:02

Humphries var langt niðri eftir tap sitt fyrir Lim árið 2020. Kieran Cleeves/PA Images via Getty Images

Luke Humphries, fyrrum heimsmeistari í pílukasti, mætir Paul Lim á heimsmeistaramótinu í Alexandra Palace í kvöld. Slæmt tap fyrir Lim breytti lífi Humphries, að hans sögn.

Humphries tapaði fyrir Lim í fyrstu umferð mótsins fyrir fimm árum síðan þegar miklar kröfur höfðu verið gerðar til Bretans. Hann segir tapið hafa dregið sig í dimma dali.

„Þetta kvöld var ég mjög vonsvikinn; mér fannst ég ekki nógu góður lengur og vildi gefast upp. Það er það sem dæmigerður ungur maður myndi gera. Við skulum gefast upp. Ég er ekki nógu góður,“ hefur SportsBoom eftir Humphries.

„Mér líkaði ekki hvernig ég leit út. Mér líkaði ekki hvernig mér leið, mér líkaði ekki hvernig ég var alltaf þreyttur, ef ég á að vera alveg heiðarlegur. Og það gerir maður þegar maður er of þungur, maður finnur fyrir mikilli þreytu.“

„Það var margt sem mér líkaði ekki við sjálfan mig og ég breytti því eða lagaði það og það gaf mér meira sjálfstraust. Ekki bara sem leikmann heldur líka sem manneskju. Og ég held að það hafi örugglega hjálpað mér að verða leikmaðurinn í dag,“ segir Humphries sem segir tapið hafa breytt lífi hans og ferli.

Það sem virtist endapunktur reyndist í raun U-beygja á ferli hans. Hann hafi í raun unnið það kvöldið fremur en tapað, enda hefur hann komist á heljarinnar skrið síðan.

Hann vann Grand Slam og Grand Prix mótin í pílukasti árið 2023 og fylgdi því eftir með sínum fyrsta heimsmeistaratitli 2024. Þá vann hann Masters-mótið og úrvalsdeildina í pílu í ár og þykir meðal þeirra sigurstranglegri á HM - á eftir Luke Littler.

Hann mætir Lim aftur í kvöld en sá er aldursforseti mótsins. Singapúrinn er 71 árs gamall og hefur leikið pílukast sem atvinnumaður síðan árið 1973, 22 árum áður en Hmphries fæddist.

Hann varð elsti maðurinn til að vinna leik á HM er hann sló Hollendinginn Jeffrey de Graaf út í fyrstu umferð á dögunum og vonast til að bæta það met enn frekar í kvöld.

David Munuya mætir í annað sinn á sviðið í Alexandra Palace í kvöld eftir sögulegan og eftirtektarverðan sigur Kenýamannsins í fyrstu umferðinni og skemmtikrafturinn Leonard Gates frá Bandaríkjunum mætir eflaust dansandi á svið.

Þá eru Ricky Evans, Nathan Aspinall og fleiri góðir í eldlínunni í dag.