Klappstýrur Björg­vins Karls slógu í gegn

Lokamótið, WFP-Finals, fór fram í Kaupmannahöfn og var um fjögurra daga keppni að ræða, frá fimmtudegi til sunnudags. Svo vel heppnaðist allt saman að það er þegar búið að staðfesta að lokamótið verður á sama stað að ári.

Björgvin Karl var eini fulltrúi Íslands á mótinu og endaði í átjánda sæti keppninnar en alls voru keppendurnir þrjátíu. Björgvin sýndi styrk með því að hækka sig um eitt sæti á lokadeginum. 

Hann tryggði sér áframhaldandi veru á World Fitness-mótaröðinni með því að vera einn af tuttugu efstu.

Bandaríkjamaðurinn James Sprague vann mótið og landi hans Dallin Pepper varð annar. Þriðji varð síðan Ástralinn Ricky Garard.

Þótt Björgvin hafi verið eini íslenski keppandinn á mótinu þá átti hann frábæran stuðningshóp í stúkunni.

Mögulega var um að ræða nokkra hressa stráka úr CrossFit Reykjavík þar sem Björgvin Karl ræður ríkjum og má leiða líkum að því að hann sé að gefa þessum efnilegu drengjum góð ráð enda fáir með meiri reynslu af CrossFit-íþróttinni en einmitt Björgvin Karl.

Klappstýruhópur Björgvins Karls sló líka í gegn með því að skapa alvöru stemmningu við að hvetja sinn mann áfram.

Þeir létu vetrarveðrið heldur ekki trufla sig mikið og voru berir að ofan í stúkunni. Þrír þeirra voru líka merktir upphafsstöðum Björgvins, BKG, en Stokkseyringurinn er einmitt þekktur undir því nafni í CrossFit-heiminum.

Auðveldara að segja BKG en Björgvin Karl fyrir útlendingana og það festist síðan við besta íslenska CrossFit-manninn sem var fastamaður á heimsleikunum í ellefu ár.