„Ég tel að þessi dómur hafi tak­markað for­dæmis­gildi“

„Auðvitað eru þetta vissulega vonbrigði. Málið fór á annan veg heldur en við héldum og lögðum upp með. Svona er lífið,“ segir Breki Karlsson, í samtali við Vísi í Hæstarétti, þar sem dómur var kveðinn upp í máli neytenda á hendur Arion banka.

Minna fordæmisgildi en síðasta mál

Málið er annað vaxtamálanna svokölluðu sem Hæstiréttur kveður upp dóm í. Dómur var kveðinn upp í máli neytenda á hendur Íslandsbanka í október síðastliðnum og hefur haft mikil áhrif á lánamarkað. Eftir uppsögu hans sagði Breki að hann hefði mikið fordæmisgildi.

Telur þú að það sama gildi hér?

„Nei, í rauninni ekki. Ég tel að þessi dómur hafi takmarkað fordæmisgildi. Þetta varðar lán sem var tekið 2017. Þá giltu önnur lög heldur en gilda í dag. Þannig að í raun og veru má segja að þetta hefur ekki fordæmisgildi fyrir lán sem er verið að veita núna, heldur var verið að dæma eftir eldri lögum sem þá giltu.“

Stutt í seinni tvö málin

Á dagskrá Hæstaréttar sé mál á hendur Landsbankanum, sem varði aftur á móti verðtryggt lán, sem tekið var eftir gildstöku laga um neytendalán. Dómurinn í dag hafi lítið gildi hvað það mál varðar og það verði spennandi að sjá hvað Hæstiréttur gerir.

Málflutningur hefur þegar farið fram í því máli og dóms er að vænta í því snemma á nýju ári. Nokkrum dögum fyrir það er dóms að vænta í öðru máli á hendur Landsbankanum, sem varðar svipaðan samning og dæmt var um í máli Íslandsbanka.

Ætla ekki með málið til Strassborgar

Kemur til greina að fara lengra með málið, til Mannréttindadómstóls Evrópu?

„Ekki þetta mál. Það, eins og ég segi, þessi lög eru fallin úr gildi. Það eru ný lög þar sem er ríkari réttur lántaka. Og þar af leiðandi held ég að það sé ekki þörf á að fara með þetta mál lengra,“ segir Breki að lokum.“