Stór hópur Íslands á EM

Sindri Sverrisson skrifar 1. desember 2025 16:00

Þau Guðmundur Leó, Birnir Freyr, Jóhanna Elín og Snæfríður Sól verða öll á EM. SSÍ

Ísland á fjölmenna sveit sundfólks á Evrópumótinu í 25 metra laug sem hefst í Lublin í Póllandi á morgun.

Alls taka tíu Íslendingar þátt á mótinu en keppni mun standa yfir fram á sunnudaginn. Langt er síðan Ísland átti svo fjölmennt lið á EM og standa vonir til þess að þetta þýði að framtíðin sé björt.

Fulltrúar Íslands eru þau Jóhanna Elín Guðmundsdóttir, Birnir Freyr Hálfdánarson, Símon Elías Statkevicius, Birgitta Ingólfsdóttir, Snorri Dagur Einarsson, Guðmundur Leo Rafnsson, Ýmir Chatenay Sölvason, Snæfríður Sól Jórunnardóttir, Vala Dís Cicero, og Hólmar Grétarsson.

Einnig náði Einar Margeir Ágústsson lágmarki en ákvað að taka ekki þátt að þessu sinni þar sem hann var að hefja háskólanám í Bandaríkjunum við University of South Carolina, og þegar staðið sig vel á mótum með skólaliðinu.

Spennan byrjar strax á morgun þegar sex sundmenn stinga sér til sunds, og Ísland verður einnig með lið í boðsundi.

Jóhanna Elín, Birnir Freyr og Símon Elías munu keppa í 50 metra flugsundi, Birgitta og Snorri Dagur munu keppa í 100 metra bringusundi, og Guðmundur Leo í 200 metra baksundi. Svo mun íslenska liðið taka þátt í 4x50 metra skriðsundi kvenna.

Heildardagskrá íslenska liðsins er hér fyrir neðan: