Hamasliðar til­búnir að sleppa gíslum og láta völd af hendi

Þetta verði gert samkvæmt friðarplani Donalds Trumps Bandaríkjaforseta en samtökin gera samt nokkrar athugasemdir við áætlun forsetans.

„Í þessu samhengi staðfestir hreyfingin vilja sinn til að fara beint í viðræður í gegnum milligöngumenn til að ræða smáatriðin í þessu samkomulagi,“ skrifa hryðjuverkasamtökin á Telegram að því er Al Jazeera greinir frá. 

Þar kom einnig fram að samtökin hefðu samþykkt að láta völd sín á Gasa af hendi til óháðrar palestínskrar stofnunar, „samkvæmt samþykki palestínsku þjóðarinnar og stuðningi araba- og íslamsríkja.“ 

Leiðtogar Hamas hafa áður sagst tilbúnir til að sleppa takinu á stjórnartaumunum á Gasa en hafa ekki viljað leggja niður vopn sín og ekkert um það kemur fram í þessari nýju yfirlýsingu. 

Trump hafði gefið leiðtogum Hamas frest til sunnudagskvölds til að samþykkja friðartillögur hans, annars stæðu þeir frammi fyrir helvíti á jörðu.

Tillögur hans sem sneru að því að binda enda á átökin á Gasaströndinni þóttu að miklu leyti halla á Hamas en margar af þessum tillögum hafa sést áður í fyrri vopnahléstillögum á undanförnum tveimur árum.

Fréttin hefur verið uppfærð.