Einn stofn­enda Play og Leifur í fram­kvæmda­stjórn Icelandair

Í tilkynningu frá Icelandair segir að breytingar hafi verið gerðar á skipulagi Icelandair þar sem tvö lykilábyrgðarsvið sem áður heyrðu undir framkvæmdastjóra rekstrar heyri nú beint undir forstjóra og staða framkvæmdastjóra rekstrar hafi verið lögð niður. 

Sylvía Kristín Ólafsdóttir lét nýverið af störfum sem framkvæmdastjóri rekstrar hjá Icelandair og tók við stöðu forstjóra Nova.

Reynsluboltar í faginu

Þá segir að við breytinguna taki stjórnendur viðkomandi sviða sæti í framkvæmdastjórn Icelandair. Þeir séu Leifur Guðmundsson og Arnar Már Magnússon.

Leifur búi yfir hátt í þrjátíu ára reynslu af flugrekstri, bæði hér á landi og erlendis. Hann hafi starfað sem tæknistjóri Icelandair (Vice President, Technical and Maintenance) frá árinu 2021 eftir að hafa stýrt tækni- og viðhaldsmálum hjá Loftleiðum, leiguflugsarmi Icelandair, og hjá Air Iceland Connect áður en starfsemi innanlandsflugs var sameinuð alþjóðaflugstarfseminni. 

Á árunum 2014 til 2017 hafi Leifur starfað sem flotastjóri hjá Avion Express í Litáen og á árunum 2009 til 2014 sem forstöðumaður á rekstrarsviði hjá SmartLynx Airlines í Lettlandi. Hann hafi hafið feril sinn í flugrekstri árið 1998 sem flugvirki hjá Flugfélagi Íslands, þar sem hann hafi starfað í rúmlega tíu ár í ýmsum störfum á tæknisviði.

Aðstoðarforstjóri í innan við þrjá mánuði

Í tilkynningunni segir að Arnar Már hafi áralanga reynslu af rekstri flugfélaga. Hann hafi verið einn af stofnendum Play árið 2019 þar sem hann gegndi stöðu forstjóra á fyrstu árum félagsins en hafi síðan verið framkvæmdastjóri rekstrar á árunum 2021 til 2024 og hafi einnig starfað um tíma sem aðstoðarforstjóri, ásamt því að vera þjálfunarflugstjóri hjá félaginu frá árinu 2019. 

Tíminn sem Arnar Már gengdi stöðu aðstoðarforstjóra var ansi skammur en hann var ráðinn í þá stöðu þann 2. maí í fyrra og lét alfarið af störfum hjá Play 30. júlí sama ár.

Þá segir að Arnar Már hafi áður starfað hjá Wow air eða á árunum 2013 til 2019 þar sem hann hafi meðal annars gangt stöðu framkvæmdastjóra flugrekstrar, flugrekstrarstjóra, yfirflugstjóra og þjálfunarflugstjóra. Fyrir þann tíma hafi hann starfað sem flugmaður og flugstjóri hjá Ryanair. Arnar Már hefji störf nú þegar.

Margir hæfir áhugasamir en enginn ráðinn

Í tilkynningunni er haft eftir Boga Nils Bogasyni, forstjóra Icelandair, að það hafi verið ánægjulegt að sjá hversu margir hæfir einstaklingar höfðu áhuga á starfi framkvæmdastjóra rekstrar, bæði innlendir og erlendir. Það sýni hversu eftirsóttur vinnustaður Icelandair er.

„Rekstrarsvið Icelandair er mjög umfangsmikið og eru starfsmenn þess um þrjú þúsund og spanna fjölbreytt störf – um borð í flugvélum, í viðhaldi flugvéla, á flugvöllum og á skrifstofu. Til þess að styðja við markmið okkar um að auka skilvirkni og styrkja samkeppnishæfni félagsins í öllum kostnaðarliðum, höfum við ákveðið að færa lykilhlutverk í flugrekstrinum nær framkvæmdastjórn félagsins. Leifur hefur náð góðum árangri með sínu teymi í skipulagi viðhalds á undanförnum misserum sem hefur verið lykilþáttur í bættri skilvirkni í flugrekstrinum. Þá erum við mjög ánægð með að fá Arnar Má til liðs við Icelandair sem kemur með ferska sýn inn í félagið. Hann hefur mikla reynslu á sviði flugrekstrar, ekki síst þar sem áherslan hefur verið á strangt kostnaðaraðhald sem rímar vel við okkar áherslur í rekstrinum. Ég hlakka til að vinna með Arnari Má og Leifi að því að byggja ofan á þann góða árangur sem við höfum náð að undanförnu – bættri stundvísi og aukinni skilvirkni sem skilar sér ekki eingöngu í lækkun einingakostnaðar heldur einnig í betri upplifun farþega.“