Alls 81 barn látist úr hungri

Þetta segir í tölfræði heilbrigðisráðuneytis Hamas um hungursneyð og vannæringu á Gasaströndinni. Þá séu um 260 þúsund börn undir fimm ára aldri sem þurfa á næringu að halda.

Matarskorturinn leiðir til þess að allar nauðsynjavörur hafa hækkað gríðarlega í verði. Samkvæmt BBC kostar pakki með 64 bleyjum 640 sikla eða rúmar 23 þúsund krónur. 25 kílógrömm af hveiti kosta þá 414 sikla eða tæpar 68 þúsund krónur og eitt kílógramm af lauk 24 sikla eða tæpar 3400 krónur.

Fleiri en þúsund manns hafa látist í árásum á meðan þau voru í matarleit samkvæmt tölfræði Sameinuðu þjóðanna. Nokkrar hjálparstöðvar eru á Gasa þar sem íbúar geta fengið eitthvað matarkyns en Bandaríkjamenn sjá um þær. 

„Í dag borða ég á sjúkrahúsinu. Þegar ég verð betri, mun ég fara aftur að þessum miðstöðvum sama hvað. Ég er sá eini sem aflar matar fyrir fjölskylduna,“ segir Mohammad al-Qedra sem er meðal þeirra sem særst hafa í árásum Ísraela á hjálparstöðvarnar.

Hjálparsamtökin UNRWA segjast þá vera með sex þúsund vörubíla af mat, lyfjum og öðrum nauðsynjavörum sem standa í bæði Jórdaníu og Egyptalandi. Þau geti ekki afhent íbúum Gasa nauðsynjavörurnar þar sem Ísraelsher komi í veg fyrir það.

Herinn neitar hins vegar að hann komi í veg fyrir sendingarnar.

Fleiri en hundrað alþjóðleg hjálparsamtök segja í sameiginlegri yfirlýsingu að hungursneyð breiðist nú út á Gasaströndinni. Á meðal þeirra eru Barnaheill og Læknar án landamæra. Einungis 28 flutningabílar með nauðsynjum komist inn á svæðið á hverjum degi en áætlað er að þurfi sex hundruð slíka á hverjum degi til að bregðast við neyðinni.