Leggja til 80 milljónum ár­lega í nýja lík­brennslu

Þetta kemur fram í tilkynningu á vef Stjórnarráðsins. Þar segir að um sé að ræða mikilvægt skref til að leysa þann bráðavanda sem legið hefur fyrir vegna athugasemda heilbrigðiseftirlits í garð starfsemi líkbrennslunnar í Fossvogi. Samhliða verði til staðar umhverfisvæn og gjaldfrjáls líkbrennsluþjónusta á Íslandi.

Stenst ekki nútímakröfur

Kirkjugarðar Reykjavíkur eru í senn reknir sem sjálfseignastofnun og almannaheillafélag, sem stafar meðal annars að líkbrennslu á grundvelli samkomulags við ríkið. Með viljayfirlýsingu hafi með varanlegum hætti verið tryggt að mikilvægir innviðir samfélagsins séu nútímavæddir og þjóni hlutverki sínu.

Líkbrennsla hefur verið starfrækt í Fossvogi af Kirkjugörðum Reykjavíkur frá árinu 1948 og er hún fyrsta og eina líkbrennsla landsins. Í tilkynningu dómsmálaráðuneytisins segir að líkbrennslan þar standist ekki lengur nútímakröfur um mengunarvarnir og hefur Heilbrigðieftirlit Reykjavíkur gert alvarlegar athugasemdir við starfsemina. Fyrirséð hafi verið að afköst brennslunnar gætu dregist verulega saman og að þörfin fyrir líkgeymslur hefðu aukist. Ef ekkert hefði verið að gert hefði getað skapast verulegur fráflæðisvandi frá heilbrigðisstofnunum.

Þessu til viðbótar hafi þörf fyrir þjónustuna aukist verulega á síðustu árum og fyrirsjáanlegt sé að aukningin verði enn meiri á komandi árum með áframhaldandi fólksfjölgun hér á landi og aukinni eftirspurn.

Starfsemi hefst á næsta ári

Áttatíu milljóna króna framlag ríkissjóðs mun nýtast til kaupa á tveimur nýjum líkbrennsluofnum og viðbyggingu við húsnæði Kirkjugarða Reykjavíkur í Gufunesi. Búnaður og ofnar verði í fremstu röð hvað varðar umhverfisvernd og mengunarvarnir. Gert er ráð fyrir að ný líkbrennsla hefji starfsemi á næsta ári.

„Ég er ánægð að þessi vandi sé leystur farsællega eftir margra ára óvissu. Með viljayfirlýsingunni eru tvær flugur slegnar í einu höggi; annars vegar bráðavandinn sem blasti við í málinu og hins vegar erum við að nútímavæða mikilvæga innviði á umhverfisvænan hátt fyrir almenning.“ er haft eftir Þorbjörgu S. Gunnlaugsdóttur dómsmálaráðherra.