Loksins slíðrað sverðin

„Þetta er áttunda kveðjuboðið mitt af því að ég er búinn að fara síðustu tvær vikur á allar starfsstöðvarnar og hitta fólkið í stöðvunum og eiga spjall við þau um hvaðan við erum að koma og hvernig hefur gengið. Það var mjög gaman að hitta fólkið, allt fólk með sterkar skoðanir sem hefur oft skammað mig kannski í 17 ár,“ sagði Hörður í kveðjuræðu sinni í gær.

Í þetta skipti hafi verið komið aðeins annað hljóð í strokkinn.

„Víst var ég sammála þér, ég var bara aðeins að halda þér við efnið,“ hefur Hörður eftir samstarfsfólki sínu og heldur áfram.

„Þetta voru skemmtilegar umræður, oft góðar spurningar og ég fékk nokkrum sinnum spurninguna: „Hvað finnst þér standa upp úr? Hverju ertu stoltastur af á þessu tímabili?“

Það var eiginlega ekki fyrr en á miðvikudaginn í Blöndu sem ég náði að kjarna hvað ég væri stoltastur af.“ Það væri sá árangur sem hafi náðst frá því að hann hóf störf.

„Ég er stoltastur af því hvernig við gerðum það. Þegar maður býr til mikil verðmæti þá svakalega oft er maður að taka af einhverjum. Það verða einhverjir sárir eftir.“

Hann hafi ekki upplifað það nú þegar hann hafi verið í samskiptum við starfsfólk, viðskiptavini, fulltrúa nærsamfélagsins við virkjanir, verktaka og stjórnmálamenn.

Greint var frá því í byrjun mánaðar að Hörður ætlaði að hætta sem forstjóri Landsvirkjunar. Fram hefur komið að hann hafi verið ósáttur við starfshætti stjórnar ríkisfyrirtækisins. Hann sagði í gær skrýtna en góða tilfinningu fylgja starfslokunum.

Hart tekist á en vitað að þetta væri sanngjarnt

Hörður sagðist hafa fengið skilaboð frá forstjórum stærstu viðsemjenda Landsvirkjunar. Þar er mest um alþjóðleg stórfyrirtæki sem reka málmbræðslur og hafa þurft að endursemja um raforkukaup. Hefur þetta skilað sér í hærri greiðslum til Landsvirkjunar.

„Það var hart tekist á en þeir eru mjög ánægðir. Ég fékk bæði skilaboð opinberlega og persónuleg skilaboð þar sem menn þökkuðu geysilega vel fyrir samstarfið, þökkuðu vel fyrir það hvernig við unnum saman af því þeir voru bara að borga það sama og annars staðar. Þeir vissu alveg innst inni að þetta var sanngjarnt.“

Einnig hafi fjöldi sveitarstjórnarmanna og nágrannar virkjana sett sig í samband við Hörð.

„Þetta eru aðilar sem við erum oft að takast á við og vilja fá hitt og þetta og við þurfum oft að segja nei og vinna með þeim en þeir eru mjög sáttir. Líka þetta hvernig við höfum haldið raforkuverði lágu til almennings og fyrirtækja. Ég er mjög stoltur af því og mér þótti vænt um það núna þegar ég fékk ályktun aðalfundar sveitarfélaga á köldum svæðum. Það var ályktað sérstaklega að þau vildu þakka Herði Arnarsyni fyrir að hafa staðið vaktina við að tryggja sanngjarnt raforkuverð. Þetta eru þeir sem eru mest fyrir barðinu á því ef raforka hækkar.“

Fréttin er í vinnslu.