Trent lagði upp er Madrídingar komust í átta liða úr­slit

Madrídarliðið var sterkara framan af leik og skapaði sér nokkur færi til að taka forystuna í fyrri hálfleik. Inn vildi boltinn þó ekki og því var enn markalaust þegar flautað var til hálfleiks og liðin gengu til búningsherbergja.

Madrídingum tókst svo loksins að brjóta ísinn á 54. mínútu þegar Gonzalo Garcia kom boltanum í netið eftir undirbúning frá Trent Alexander-Arnold, sem nýverið gekk til liðs við Real Madrid frá Liverpool.

Fleiri urðu mörkin ekki og niðurstaðan varð 1-0 sigur Real Madrid, sem er á leið í átta liða úrslit á kostnað Juventus. Madrídingar mæta annað hvort Dortmund eða Monterrey í átta liða úrslitum.