Segja lækkun á olíu ekki hafa skilað sér til ís­lenskra neyt­enda

Þróun á erlendum mörkuðum hefur verið hagfelld íslenskum olíumarkaði samkvæmt greiningu hagfræðings ASÍ. Heimsmarkaðsverð olíu hafi þannig leitað niður á við og gengi krónunnar gagnvart Bandaríkjadollar styrkst. Alls hafi olíutunnan lækkað um tíu prósent mælt í krónum frá áramótum.

Á sama tíma og dagsmeðaltalsverð á 95 oktana bensíni hafi lækkað um rúm tvö prósent frá upphafi árs hafi meðal brúttóhagnaður af seldum bensínlítra hækkað um tæp þrjú prósentustig frá 2024.

Ætti að verða rúmum fjögur þúsund krónum ódýrari að fylla á smábíl

Hagfræðingur ASÍ telur að fyrirhugað kílómetragjald stjórnvalda samhliða niðurfellingu álagningar á jarðefnaeldsneyti leiði til lægra útsöluverðs. 

Sé miðað við verð sem ASÍ styðst við fyrir júní ætti lítrinn af 95 oktana bensíni að lækka um rúmar hundrað krónur. Það jafngildi rúmum 4.200 krónum ef dælt sé á smábíl með 42 lítra tank. 

Hagfræðingurinn slær þann varnagla að þetta sé háð því að verð til olíufélaga haldist óbreytt. Innistæða sé fyrir því að sá hluti bensínverð lækki enn frekar í ljósi þróunar heimsmarkaðsverðs.

Munaði mest hátt í 33 krónum á milli stöðva

Mikill verðmunur er á milli fyrirtækja en einnig á milli stöðva einstakra fyrirtækja samkvæmt tölum ASÍ. Lægsta lítraverðið var hjá Costco í Garðabæ en þar á eftir hjá Atlantsolíu. Hæsta meðalverðið var hjá Olís.

Mesti verðmunur á milli stöðva innan sama dags nam 32,7 krónum á höfuðborgarsvæðinu í byrjun mars þegar litið var hjá Costco-stöðinni sem er jafnan ódýrari en aðrar. Þannig munaði rúmum 1.300 krónum að fylla bíl með fjörutíu lítra tank á stöð Olís í Ánanaustum annars vegar og Atlantsolíu við Skúlagötu.