Spor­vagni ekið inn í matar­vagn í Gauta­borg

Slysið átti sér stað við gatnamót í miðborginni skömmu fyrir klukkan eitt í nótt að staðartíma. Lögreglan segir að sporvagninn hafi komið á mikilli ferð að krappri vinstri beygju, farið út af sporinu og yfir gatnamótin. Vagninn hafi runnið töluverðan spöl og síðan hafnað á flatbökumatarvagni.

„Ég hef aldrei séð neitt þessu líkt. Sporvagninum var ekið svo hratt og beinnt áfram, án þess að hemla,“ segir Emil Österberg, þjónn á veitingastað í nágrenninu sem varð vitni að slysinu, við sænska ríkisútvarpið.

Einn þeirra slösuðu er vagnstjórinn. Hinir eru farþegar, vegfarendur og starfsmenn matarvagnsins. Í morgun voru þrír af þeim átta sem voru fluttir á sjúkrahús í nótt þar enn.

Rannsókn er hafin á tildrögum slyssins og hvort að vagnstjórinn hafi gerst sekur um stórkostlegt gáleysi. Lögreglan segist telja líklegt að öryggismyndavélar hafi náð myndum af slysinu.