Slá færri svæði í nafni sjálfbærni

„Markmiðið er að gleðja lífríkið og augað en einnig er sparnaður í því að endurhugsa svæði og hætt að slá þar sem það er ekki nauðsynlegt,“ segir í tilkynningu frá Reykjavíkurborg.

Valin verða svokölluð viljandi villt svæði og grasið ekki slegið til að auka líffræðilega fjölbreytni. Þess konar svæði séu til að mynda með fram stærri umferðaræðum og er vonin sú að fuglar og aðrar lífverur njóti góðs af mismunandi plöntum og gróðri.

Tekið er fram að áhersla verði lögð á að slá svæði sem liggja upp að lóðum íbúa og með fram stígum og götum auk skrúðgarða og mikið notuðum svæðum inni í hverfum.

Svokölluðu villtu svæðin verða til að mynda þar sem nú þegar sé búið að planta trjám sem gætu orðið fyrir sláttutækjum. Til að mynda verða þá svæði við Rafstöðvarveg og Sævarhöfða slegin einu sinni í sumar, í stað þriggja skipta líkt og áður.

„Þó að svæði verði skilgreind viljandi villt þýðir það ekki að þeim verði ekki sinnt, heldur verður það gert með öðrum hætti en áður. Búast má við því að sumstaðar verði slegið að minnsta kosti einu sinni á ári.“

Í tilkynningu segir að um sé að ræða þekkta aðferð sem sé notuð meðal annars í Svíþjóð og Danmörk. Múlaþing tók einnig upp á því síðasta sumar að velja viljandi villt svæði með góðum árangri.