Tíu látnir í Graz: Byssu­maðurinn sagður vera gamall nemandi

Kronen Zeitung greindi frá því í morgun að umfangsmikil lögregluaðgerð stæði yfir við BORG-menntaskólann við götuna Dreierschützengasse í Graz, sem er næststærsta borg Austurríkis. Miðillinn segir árásina eina verstu skotárás í sögu landsins.

Tíu eru látnir; átta nemendur, einn fullorðinn og árásarmaðurinn. Fjöldi særðra er óljós en nemur tveggja stafa tölu að sögn lögreglu. Bæði nemendur og kennarar urðu fyrir skoti.

Þýskir miðlar greina frá því að árásarmaðurinn sé 22 ára fyrrverandi nemandi við skólann. Hann hafi borið tvö skotvopn, skammbyssu og haglabyssu, og hafið skothríð inni í tveimur skólastofum.  Lögreglu grunar að árásarmaðurinn hafi talið sig þolanda eineltis í skólanum. Þýskir miðlar segja að hann hafi svipt lífi í kjölfar árásarinnar og fundist látinn inni á salerni skólans.  

Um 160 sjúkraflutningamenn voru ræstir út, að sögn Kronen Zeitung, og alls 65 sjúkraflutningabílar. Christoph Wiederkehr, menntamálaráðherra Austurríkis er á leiðinni til Graz vegna árásarinnar.

Viðbragðsaðilar eru nú að yfirgefa svæðið þar sem það er talið öruggt að nýju.