Enn karpa þing­menn um bókun 35

Nú síðdegis hafa þingmenn enn verið að tínast inn á mælendaskrá, einkum úr röðum stjórnarandstöðunnar. Samkvæmt dagskrá þingsins hafa fjögur önnur mál, sem áttu að vera á dagskrá í dag, verið tekin af dagskrá.

Forseti Alþingis tilkynnti forsætisnefnd og formönnum þingflokka í gær að starfsáætlun Alþingis hefur verið felld úr gildi, en upphaflega gerði starfsáætlun ráð fyrir því að þingstörfum myndi ljúka á föstudaginn í næstu viku. Ljóst þykir að þing mun starfa eitthvað lengur inn í sumarið. Þó er gert ráð fyrir að eldhúsdagsumræður fari fram samkvæmt fyrri áætlun miðvikudagskvöldið 11. júní.

Ekki liggur fyrir hve lengi þingfundur mun standa yfir í dag, en á morgun er hvítasunnudagur og annar í hvítasunnu á mánudaginn, og því ólíklegt að þing komi aftur saman fyrr en á þriðjudag.