Ís­lendingar von­góðir um að finna heitt vatn á Tenerife

Í fréttatilkynningu frá Reykjavík Geothermal segir að félagið, ásamt orkufyrirtækinu DISA, stærsta fyrirtæki Kanaríeyja, og stjórnvöldum á Tenerife í gegnum opinberu fyrirtækin ITER og Involcan, standi saman að verkefninu og hafi stofnað verkefnafélagið Energía Geotérmica de Canarias (EGC), sem muni hefja fyrstu jarðhitaleitina með borunum á suðurhluta eyjarinnar í september. 

Formleg stofnun á EGC hafi verið fram með undirritun við hátíðlega athöfn í Santa Cruz á Tenerife í dag. Borholurnar verði á bilinu 2.500 til 3.000 metra djúpar og markmiðið sé að staðfesta aðstæður til orkuframleiðslu með jarðhita sem hreinni, stöðugri og staðbundinni orku sem nýtist allt árið um kring.

Langstærsti hluti rafmagns kemur nú úr ljósavélum

Jarðhitaleitin eigi sér stað í samhengi við sífellt brýnni þörf eyjarinnar fyrir sjálfbæra og hagkvæma orku. Í dag komi yfir áttatíu prósent rafmagnsframleiðslu á Tenerife úr innfluttri olíu, sem brennd sé í ljósavélum. 

„Slíkt fyrirkomulag er bæði umhverfislega skaðlegt og gríðarlega dýrt, og þarf spænska ríkið að niðurgreiða orkukostnaðinn fyrir íbúa eyjunnar og reyndar á öllum Kanaríeyjum. Þar sem hvorki er hægt að virkja vatnsafl á eyjunni né talið svigrúm til að byggja fleiri stór vind- og sólarorkuver, sem taka um tífalt meira landrými en sambærileg jarðhitaorkuver, hefur nýting jarðhita vaxandi vægi í framtíðaráætlunum stjórnvalda á eyjunni.“

Deila íslenskri þekkingu

Reykjavík Geothermal komi að verkefninu bæði sem eigandi og tæknilegur leiðandi. Fyrirtækið hafi víðtæka reynslu af þróun jarðhitaverkefna víða um heim og nýti nú þá þekkingu til að styðja við fyrsta skrefið í nýtingu jarðhita á Tenerife.

„Þetta verkefni er byggt á reynslu, þekkingu og trú okkar Íslendinga á jarðhita sem sjálfbæran orkugjafa, og gæti gjörbreytt aðstæðum til orkuframleiðslu á Tenerife. Það traust sem samstarfsaðilar okkar í verkefninu leggja til okkar er mikil viðurkenning á íslensku hug- og verkviti á sviði jarðhita og heiður fyrir okkur,“ er haft eftir Magnúsi Ásbjörnssyni, forstjóra Reykjavík Geothermal.

Tveggja ára rannsóknir gefi ástæðu til bjartsýni

Jarðvísindarannsóknir, umhverfisrannsóknir og undirbúningsvinna hafi staðið yfir síðast liðin tvö ár. Yfirborðsathuganir sem framkvæmdar hafi verið árið árið 2024 hafi sýnt efnilegar vísbendingar um jarðhita á suður- og vesturhluta eyjarinnar. 

Nú sé beðið eftir endanlegri stjórnsýslulegri heimild frá yfirvöldum Kanaríeyja til að hefja boranir en borverkið hafi þegar verið boðið út. Ef boranir reynist árangursríkar sé reiknað með að uppbygging jarðhitaorkuvera geti orðið mikilvæg viðbót í orkuframboði Tenerife, stuðlað að orkuskiptum á eyjunni og dregið þannig verulega úr notkun á innfluttri olíu.