Spá 0,25 prósenta hækkun stýrivaxta

Gangi spá bankans eftir verða meginvextir bankans 7,5%, líkt og þeir voru frá maí fram í nóvember í fyrra.

Peningastefnunefnd Seðlabankans ákvað í einum rómi að halda stýrivöxtum óbreyttum í febrúar þrátt fyrir vaxandi verðbólgu. Þau sem standa að greiningunni hjá Íslandsbanka segja að þeim, ásamt öðrum, hafi þótt nefndin vera rólegri í febrúar en efni stóð til, sér í lagi með tilliti til nýlegrar þróunar verðbólgu og verðbólguvæntinga.

„Eftir á að hyggja hefði verið heppilegra að sleginn hefði verið fastari tónn í yfirlýsingu peningastefnunefndar þá enda hafa horfur síst batnað síðan. Þá virtist fremur lítið hafa verið rætt um möguleikann á hækkun vaxta ef marka má fundargerð febrúarfundanna þótt vaxtahækkun hafi vissulega borið á góma,“ segir í greiningu Íslandsbanka.

Í febrúar taldi nefndin að þótt verðbólga hefði aukist frá nóvember og verðbólguþrýstingur enn verið talsverður, meðal annars vegna breiðra verðhækkana og hárrar verðbólguvæntingar, væru jafnframt skýr merki um kólnun í hagkerfinu, þar á meðal á vinnumarkaði og húsnæðismarkaði, og útlit fyrir að verðbólga hjaðnaði þegar liði á árið; óvissan væri þó áfram mikil vegna launahækkana og því gæti reynst nauðsynlegt að halda vöxtum óbreyttum lengur en ella eða jafnvel hækka þá aftur ef verðbólguhorfur versnuðu frekar.

Greiningardeildin vonast til þess að með hjaðnandi verðbólgu og auknum slaka í hagkerfinu skapist rými til vaxtalækkunar sem staðið gæti fram eftir árinu 2027 og lokið með stýrivexti í kringum 6%. Forsenda fyrir frekari lækkun vaxta umfram það væri að verðbólga næði niður í markmið og/eða efnahagsþróunin verði markvert óhagstæðari en greiningardeildin gerir ráð fyrir.