„Blasir við öllum“ að at­huga­semdir SA skili ekki árangri

Daði Már Kristófersson boðaði föstudaginn 27. febrúar síðastliðinn aðgerðir gegn verðbólgu á allra næstu dögum. Hann myndi ræða við aðila vinnumarkaðarins strax eftir helgina og ráðast svo í aðgerðir í nokkrum liðum.

Síðan þá hefur syrt nokkuð í álinn eftir árásir Bandaríkjamanna og Ísraela á Íran, með tilheyrandi hækkun heimsmarkaðsverðs olíu og áhrifum hennar á verðlag um allan heim.

Samtölin gangi vel

Daði Már ræddi málið við Berghildi Erlu Bernharðsdóttur fréttamann að loknum ríkisstjórnarfundi í morgun.

Þú hefur verið í samtali við vinnumarkaðinn, hvernig stendur málið?

„Samtölin ganga bara mjög vel. Þau munu klárast núna í vikunni og ég á von á því að við getum tilkynnt eitthvað mjög fljótt.“

Hjálpi ekki til í bráð

Bjarni Benediktsson, sem tók við sem framkvæmdastjóri Samtaka atvinnulífsins í upphafi mánaðar, ræddi verðbólguna í kvöldfréttum Sýnar í gær og var nokkuð gagnrýninn að aðgerðir stjórnvalda í þeim efnum.

Hafið þið verið á einu máli með þessar aðgerðir?

„Auðvitað erum við það ekki og varðandi gagnrýni SA, þá blasir nú raunar við, held ég, öllum, að þeirra athugasemdir eru nú ekki líklegar til þess að skila árangri, alla vega ekki í neinni bráð. Hins vegar hefur samtalið verið uppbyggilegt og ég hef verið mjög ánægður með hversu málefnalegt það hefur verið,“ segir Daði Már.

Óveðursský

Sérðu fyrir þér núna miðað við núverandi ástand, að verðbólgan sé eitthvað að fara að hjaðna?

„Það eru auðvitað ákveðin óveðursský. Stríðið í Íran og hækkun á olíuverði veldur okkur áhyggjum. Það er auðvitað innflutt verðbólga sem engar aðgerðir á Íslandi myndu koma í veg fyrir, en það hjálpar okkur ekki í verkefnunum.“