Sam­þykktu að selja Perluna fyrir 3,5 milljarða

Félagið hefur verið með starfsemi í Perlunni um nokkurt skeið en kemur nú til með að kaupa húsið að fullu, samkvæmt kaupsamningnum sem samþykktur var á fund borgarráðs í dag.

Börnin fái að koma í heimsókn

Í fundargerð er vísað til bókunar fulltrúa meirihlutaflokkanna í borgarstjórn, þar sem því er lýst yfir að þremur kvöðum verði þinglýst á eignirnar samhliða kaupsamningi:

1. Reykjavíkurborg hafi forkaupsrétt að eignunum.
2. Perlan verði nýtt undir afþreyingartengda starfsemi, svo sem söfn, sýningar, veitingaþjónustu eða annað sem geri staðinn að aðlaðandi áfangastað fyrir almenning í Reykjavík. 
3. Börn í grunnskólum Reykjavíkurborgar geti komið í skipulagðar grunnskólaheimsóknir í þau náttúrusöfn sem verði rekin í eignunum endurgjaldslaust tvisvar sinnum á skólagöngunni í 1. til 10. bekk.

Umræða um brunaútsölu Einari ekki að skapi

Fulltrúar Sjálfstæðisflokksins í borgarráði sátu hjá við afgreiðslu kaupsamningsins. Þrátt fyrir það bókuðu þeir um stuðning sinn við sölu Perlunnar, en gerðu fyrirvara við „greiðslufyrirkomulag og óljós vilyrði um byggingarheimildir“.

Einar Þorsteinsson, fyrrverandi borgarstjóri og fulltrúi Framsóknar í borgarráði, studdi söluna og lagði fram eftirfarandi bókun:

„Framsókn styður sölu Perlunnar og minnir á að umræða um brunaútsölu á eignum til þess að bæta fjárhagsstöðu borgarinnar fyrir áramót var ómálefnaleg enda sýnir ársreikningur að borgarsjóður var rekinn með tæplega fimm milljarða afgangi þrátt fyrir að Perlan seldist ekki fyrir áramót. Perlan er hér seld á uppsettu verði og sú starfsemi sem þar er í dag heldur áfram og mun nýtast bæði reykvískum skólabörnum og almenningi öllum jafnt sem ferðamönnum.“