Hvernig gerum við Grundarhverfi enn betra?

Á Kjalarnesi undir mikilfenglegum hlíðum Esjunnar við norðurenda Kollafjarðar stendur Grundarhverfi, eitt yngsta og fámennasta hverfi Reykjavíkur. Þar er fagurt bæjarstæði, góðir landkostir og nægt byggingarland fyrir fjölbreyttan húsakost sem mikill skortur er á um þessar mundir.

Ágæti íbúi í Grundarhverfi og nágrenni; Hvernig vilt þú að hverfið þitt þróist og vaxi á næstu árum? Og hvernig er hægt að gera Grundarhverfið enn betra hverfi fyrir þig og fjölskyldu þína? Þessum spurningum og fjölmörgum öðrum verður velt upp á samráðsdögum í Klébergsskóla á Kjalarnesi dagana 29. til 30. apríl næstkomandi. Þessir samráðsdagar eru til þess að undirbúa endurskoðun á aðalskipulagi Kjalarness og gerð hverfisskipulags fyrir Grundarhverfi og nágrenni.

Byggðin undir Esjuhlíðum

Þó byggðin í Grundarhverfi sé ung er búseta þar eldgömul en landnámsmaðurinn Helgi Bjóla samferðarmaður Ingólfs Arnarsonar reisti sér bæ undir hlíðum Esjunnar að Hofi skv. Landnámu.

Saga Grundarhverfis nær aftur til 1973 en þá tók að myndast þar þéttbýliskjarni. Forsenda fyrir myndun þéttbýlisins var Klébergsskóli sem var reistur árið 1929 eftir teikningum Guðjóns Samúelssonar og telst vera elsti grunnskóli í Reykjavík sem enn er rekinn undir sama þaki. Það er svo árið 1998 sem Kjalarneshreppur sameinast Reykjavík og Grundarhverfi og varð eitt af 32 hverfum borgarinnar. En hverfið er fámennt miðað við önnur hverfi borgarinnar. Þjónusta er af skornum skammti og engin eignlegur hverfiskjarni. Fjarlægðir í aðra þjónustukjarna er allnokkur og almenningssamgöngur takmarkaðar.

Aðalskipulagið og vistvænt hverfi

Forsendur hverfisskipulagsvinnunnar í Grundarhverfi er aðalskipulag Reykjavikur 2040. Þar eru lagðar línurnar um framtíðaskipulag borgarinnar og hverfanna. Leiðarstefið er sjálfbær, lífvænleg og kolefnishlutlaus borg, þétt og blönduð borgarbyggð með sterkum hverfiskjörnum, vistvænum samgöngum og góðu almenningsrými og grænum svæðum. Öll þessi atriði ásamt breytingum á fasteignum eru ávörpuð í skipulagsskilmálum hverfisskipulags. Samhliða vinnu við hverfisskipulagið fer fram vinna við endurskoðun á aðalskipulagi Kjalarness eins og þegar hefur komið fram.

Samráð

Lykilþáttur við vinnu hverfisskipulags er samráð við íbúa og hagaðila. Þessu samráði er skipt í þrjá fasa, sjá skýringarmynd fyrir neðan. Samráðið er skilgreint vinnuferli sem byggir á lýðræðisstefnu Reykjavíkurborgar þar sem haft er samráð við íbúa, hagsmunaaðila og opinbera umsagnaraðila á öllum stigum skipulagsvinnunnar. Kjörorðin í þessari vinnu eru að hlusta, rýna, breyta og miðla. Í samráðinu er byrjað með autt blað og endað með fullmótað skipulag. Notaðar eru fjölbreyttar samráðsaðferðir til að ná til sem flestra.

Þær hugmyndir og tillögur sem verða til í samráðsferlinu eru notuð við að bæta og þróa afurðir hverfisskipulagsins þannig að úr verði betra hverfiskipulag sem byggir eins og kostur er á hugmyndum og óskum íbúa og hagaðila.. Á netsíðu hverfisskipulagsins fyrir Kjalarnes má finna frekari upplýsingar um verkefnið.

Samráðsdagar 29. til 30. apríl

Eins og komið hefur fram er íbúðum og hagaðilum í Grundarhverfi og Kjalarnesi boði til samtals um þróun hverfissins og borgarhlutans á samráðsdögum sem fara fram í Klébergsskóla. Þar verður annars vegar fjallað um fyrirhugaðar breytingar aðalskipulagi Kjalarness og hins vegar um gerð hverfisskipulags fyrir Grundahverfi og nágrenni.

Á fyrri degi samráðsins sem hefst kl 17 verða kynningar á endurskoðun á aðalskipulagi og gerð hverfisskiplags. Síðan verða vinnustofur þar sem rætt verður um hvernig sé hægt að efla Grundarhverfi, þróun byggðar í dreifbýlinu, atvinnuþróun og efling atvinnulífs, útivist, náttúruvernd og skógrækt og að lokum samgöngur.

Á opnu húsi seinni daginn sem hefst kl 15 verður hægt að koma á framfæri hugmyndum og ræða við sérfræðinga Reykjavíkurborgar. Þar verða sérfræðingar frá Umhverfis- og skiplagssviði um aðal- og hverfisskiplag, samgöngumál, sorphirðu, umhirðu borgarlandsins og snjómokstur og fulltrúar frá Heilbrigðiseftirliti Reykjavíkur. Einnig verður hægt að ræða við sérfræðinga frá Skóla- og frístundasviði um leik- og grunnskólamál, sérfræðinga frá Velferðarsviði og sérfræðingar frá Menningar og íþróttasviði. Þessir sérfræðingar eru til þess að svara spurningum sem brenna á íbúum en líka til þess að heyra skoðanir þeirra sem nýst geta við aðalmarkmið þessarar vinnu: Að gera gott Grundarhverfi enn betra.

Ákall um þátttöku

Samráðið það sem er framundan á Kjalarnesi er bæði fjölbreytt og spennandi. Það er sett upp til þess að raddir og skoðanir sem flestra heyrist. Leitað er eftir skoðunum grunnskólabarna og ungmenna, ungra foreldra og einstaklinga, sambúðaraðila og eldri borgara og annarra sem skipulagið varðar.

Kæru íbúar. Það borgar sig að láta í sér heyra og taka þátt í samráðinu. Reynslan frá samráðinu í Árbæ, Breiðholi, Háaleiti -Bústöðum og Hlíðum sannar að við hlustum á ykkar sjónarmið. Þess vegna hlökkum við til að eiga við ykkur uppbyggilegt og gott samtal um framtíð ykkar hverfis.

Höfundur er deildarstjóri Hverfisskipulags Reykjavíkur/ Ph.D. arkitekt Umhverfis- og skipulagssvið Reykjavíkur