ÍA og Vestri mætast inni

Í tilkynningu Skagamanna segir að ákvörðunin sé vegna stöðunnar á Akranesvelli og að haft hafi verið gott samráð við KSÍ og Vestra:

„Grassérfræðingar telja Akranesvöll ekki leikfæran að svo stöddu og að leikur á vellinum á þessum tímapunkti gæti skaðað hann til lengri tíma. Því var tekin sú ákvörðun í góðu samráði við KSÍ og Vestra að spila leikinn innandyra.“

Leikurinn fer fram á miðvikudagskvöld klukkan 18.

Í fyrra léku Skagamenn fyrstu tvo heimaleiki tímabilsins í Akraneshöllinni og unnu fyrst Fylki, 5-1, en töpuðu svo 2-1 fyrir FH.

Á vef KSÍ kemur einnig fram að leikur ÍBV og Fram í Vestmannaeyjum verði leikinn á Þórsvelli, líkt og þegar Eyjamenn slógu Víkinga út úr Mjólkurbikarnum á fimmtudaginn, á meðan að beðið er eftir því að Hásteinsvöllur verði klár. KR-ingar hafa svo þurft að byrja leiktíðina á að spila heimaleiki sína á AVIS-vellinum í Laugardal, á meðan að framkvæmdir standa yfir á Meistaravöllum.