„Þetta er pólitískt val og með­vituð á­rás á getu fólks til að lifa af“

Ísrael batt enda á vopnahlé í síðasta mánuði og hóf á ný sprengjuárásir sínar. Hundruð manna hafa drepist í þeim árásunum og ísraelski herinn hertekið stóra hluta svæðisins til að þrýsta á Hamas að samþykkja breytingar á vopnahléssamkomulaginu sem myndu flýta fyrir lausn gísla. Árásir Ísraela í nótt, aðfaranótt fimmtudags kostuðu minnst 23 lífið, þar af tíu manna fjölskyldu.

AP-fréttaveitan greinir frá þessu. Fimm börn, fjórar konur og karl úr sömu fjölskyldu, létust í árás á borgina Khan Younis í suðurhlutanum. Öll hlutu þau alvarleg brunasár, að sögn Nasser-sjúkrahússins sem tók á móti líkunum. Árásir á norðurhluta Gasa kostuðu þrettán manns lífið, þar af níu börn, að sögn Indónesíska sjúkrahússins.

Ísraelski herinn segist forðast það að særa óbreytta borgara og kennir Hamas um dauðsföllin þar sem samtökin starfi í íbúðahverfum.

„Gasasvæðið stendur nú líklega frammi fyrir sinni verstu mannúðarkreppu á þeim átján mánuðum sem liðnir eru frá því að hernaðarátökin stigmögnuðust í október 2023,“ segir Mannúðarskrifstofa Sameinuðu þjóðanna.

Nær allir treysta á mannúðaraðstoð

Mannúðarskrifstofa Sameinuðu þjóðanna (OCHA) segir að nær allir íbúar Gasa, sem telja rúmlega tvær milljónir, treysti nú á eldhús sem studd eru af hjálparsamtökum. Þau geti einungis útbúið eina milljón máltíða á dag sem dugi því skammt. Búið sé að loka öðrum fæðudreifingarúrræðum vegna skorts á birgðum.

Einnig er hægt að nálgast mat á mörkuðum á Gasa en útbreiddur skortur og hækkandi verð hefur leitt til þess að 80 prósent íbúa treysta nú á mannúðaraðstoð, samkvæmt nýrri skýrslu Matvælaáætlunar Sameinuðu þjóðanna.

Vatn af skornum skammti og erfiðara að ná til barna

Vatn er líka að verða af skornum skammti og standa Palestínumenn í löngum röðum við vörubíla til að fylla brúsa með vatni. Omar Shatat, sem starfar hjá vatnsveitu á svæðinu, segir að fólk sé komið allt niður í sex eða sjö lítra á dag, sem sé langt undir því magni sem Sameinuðu þjóðirnar áætla að þurfi til að mæta grunnþörfum.

Í mars hófu yfir 3.600 börn meðferð vegna bráðrar vannæringar, samanborið við um 2.000 í mánuðinum áður, samkvæmt Mannúðarskrifstofa Sameinuðu þjóðanna. Hún segir næringarástandið fara hratt versnandi.

Á sama tíma sé geta hjálparsamtaka til að meðhöndla vannærð börn takmörkuð vegna loftárása Ísraela og landhernaðar sem hófst aftur 18. mars.

Neydd til að horfa á fólk þjást

Í mars fækkaði þeim börnum undir fimm ára aldri sem hjálparstarfsmenn gátu útvegað næringarhjálp um 70 prósent frá mánuðinum áður, eða niður í 22.300 börn. Þetta er einungis hluti af 29.000 barna markmiði þeirra. Einungis 60 prósent af 173 meðferðarstöðum eru enn starfræktir og eftirspurn eftir ört minnkandi birgðum eykst, segir Mannúðarskrifstofa Sameinuðu þjóðanna.

„Hjálparstarfsmenn hafa verið neyddir til að horfa á fólk þjást og deyja á meðan þeir bera þá óhugsanlegu byrði að veita neyðaraðstoð þegar birgðir eru tómar, á sama tíma og þeir standa frammi fyrir sömu lífshættulegu aðstæðum sjálfir,“ segir Amande Bazerolle, neyðarstjóri á Gasa hjá hjálparsamtökunum Læknar án landamæra.

„Þetta er ekki til marks um bresti í mannúðaraðstoð – þetta er pólitískt val og meðvituð árás á getu fólks til að lifa af,“ segir hún í yfirlýsingu.