Full­yrðir að að­eins Trump hefði getað komið á friðar­við­ræðum

Fundur sendinefnda Rússlands og Bandaríkjanna í Sádi-Arabíu í dag verður að teljast nokkuð sögulegur. Að loknum fyrsta fundi sögðu utanríkisráðherrar ríkjanna tveggja að þeir hygðust setja á fót samningnefndir til að stýra viðræðum um endalok stríðsins í Úkraínu. Brýnast væri þó að skipa sendiherra Rússlands í Bandaríkjunum og sömuleiðis sendiherra Bandaríkjanna í Rússlandi og bæta diplómatísk samskipti sem Sergei Lavrov, utanríkisráðherra Rússlands, kennir Biden-stjórninni um að hafa spillt.

„Endalausar brottvísanir sendifulltrúa okkar, sem við urðum að svara, viðvarandi vandamál, frysting eigna okkar og margt, margt fleira.“

Þá sagði Lavrov Bandaríkjamönnum að Rússar myndu ekki sætta sig við viðveru hermanna frá NATÓ ríkjunum í Úkraínu, sama í hvaða mynd.

Marco Rubio, utanríkisráðherra Bandaríkjanna, kvaðst þá sannfærður um samningsvilja Rússa. En til að ná árangri þyrftu stríðandi fylkingar að gefa eftir.

„Evrópusambandið verður að koma að borðinu á einhverjum tímapunkti því það hefur líka beitt refsiaðgerðum. Aðalmálið hérna er að markmiðið, sem við erum sammála um er að binda enda á þessi átök,“ sagði Rubio.

Segir Trump eina leiðtogann sem gæti komið viðræðum á

Rubio eignaði núverandi Bandaríkjaforseta heiðurinn að því að viðræðurnar ættu sér stað yfir höfuð.

„Þótt þessi átök hafi staðið í þrjú ár hefur engum öðrum tekist að gera neitt líkt því sem við sáum í dag því Donald Trump er eini leiðtoginn sem getur það.“

Á meðan Rússar og Bandaríkjamenn funduðu í Sádi-Arabía var Úkraínuforseti staddur í opinberri heimsókn í Tyrklandi þar sem hann lýsti furðu sinni yfir atburðarásinni.

„Ég er sannfærður um að fyrir Úkraínu og fyrir okkar heimshluta, fyrir Evrópu, skiptir það öllu máli að við samningaviðræður um að binda enda á stríðið verði ekki farið á bakvið þá sem hafa orðið fyrir innrás Rússa,“ sagði Zelensky.

Zelensky var ekki sá eini sem undraðist yfir atburðarásinni sem leiddi til þess að Rússar og Bandaríkjamenn hæfu friðarviðræður án aðkomu Úkraínu.

Íslenskir ráðherrar undrast líka á fjarveru Úkraínu við samningaborðið

Kristrún Frostadóttir, forsætisráðherra var spurð út í vendingarnar að loknum ríkisstjórnarfundi í dag.

„Ég held að það skipti máli að við höldum því áfram til haga að Úkraína þarf að sitja við þetta borð og Evrópa þarf að sitja við þetta borð. Þetta snýst um stöðu öryggis- og varnamála og friðarmála í Evrópu og það hafa verið skilaboðin sem hafa komið frá leiðtogum Evrópuríkja.“

Þorgerður Katrín Gunnarsdóttir utanríkisráðherra sagði að nú væru að eiga sér stað straumhvörf í málinu.

„Það er auðvitað sérstakt að Bandaríkin eru að funda með Rússum í Sádi-Arabíu um frið í Úkraínu og Evrópu en við skulum bara bíða og sjá. Vonandi kemur eitthvað út úr þessu.“

Þorgerður sótti öryggisráðstefnu í Munchen og fannst gott að heyra á öðrum kjörnum fulltrúum í Evrópu að þeir væru sammála um að vilja taka afgerandi skref.

„Ekki bara vilja heldur ætla að taka þau skref sem þarf að taka til að tryggja frið í Úkraínu því friður í Úkraínu þýðir friður í Evrópu. Ef við ætlum ekki að verjast Pútín og við náum ekki friði í Úkraínu þá þýðir það mikið óöryggi fyrir öll önnur ríki í Evrópu og þess vegna erum við Íslendingar meðal annars að segja staðfastlega að við stöndum með Úkraínu og við stöndum með því að Evrópa og Úkraína verði röddin við borðið.“