Draga minnis­blað til baka eftir mikla ó­reiðu

Þegar minnisblaðið var sent út á mánudagskvöldið, af fjármálaskrifstofu Hvíta hússins (OBM), stóðu forsvarsmenn margskonar verkefna, samtaka og stofnana sem reiða sig á stuðning frá ríkinu frammi fyrir því að eiga ekki peninga.

Minnisblað þetta byggði á forsetatilskipun Trumps sem segir til um allsherjar endurskoðun á styrkjum alríkisins.

Minnisblaðið truflaði einnig starfsemi Medicaid-kerfisins, sem milljónir Bandaríkjamanna reiða á fyrir sjúkratryggingar.

Í frétt AP fréttaveitunnar segir einnig að starfsmenn Hvíta hússins hafi lent í miklum vandræðum með að útskýra skipunina og umfang hennar. Óreiðan leiddi til þess að ákveðið var að taka hana til baka.

Kenna fjölmiðlum og dómara um

Í tilkynningu frá Karoline Leavitt, talskonu Trumps, sem New York Times vitnar í, segir að forsetatilskipun Trumps, sem minnisblaðið byggði á, sé enn í gildi.

Leavitt kennir fjölmiðlum og dómaranum sem frestaði gildistöku stöðvunarinnar um óreiðuna sem skipunin olli. Þess vegna hafi verið ákveðið að draga skipunina til baka.

Hún sendi síðan í kjölfarið út tíst þar sem hún ítrekaði að forsetastilskipunin væri enn í gildi. Það væri einungis minnisblað OMB sem hefði verið dregin til baka.

Enn ríkir talsverð óvissa vestanhafs um hvað þetta þýðir fyrir áðurnefnd verkefni, samtök og aðra styrkþega. 

Þingið á að stýra ríkissjóði

Þá var einnig óljóst hvort skipun Trumps var yfir höfuð lögleg, þar sem um er að ræða peninga sem þingið hefur þegar samþykkt að eyða. Eins og áður hefur komið fram frestaði dómari gildistöku stöðvunarinnar í gær.

Annar dómari setti svo einnig lögbann á tilskipun Trumps í kvöld. Saksóknarar nokkurra ríkja sem höfðuðu mál vegna hennar héldu því fram að tíst Leavitt sýndi að tilskipunin var enn virk og var það eftir að dómarinn sagðist vera að íhuga að fella tímabundinn fyrri úrskurð sinn í gildi.

Hann vísaði svo til tísts talskonunnar og sagði að það að fella minnisblaðið úr gildi hefði lítil áhrif á tilskipunina sjálfa og beitti því lögbanni á hana.

Samkvæmt stjórnarskrá Bandaríkjanna á þingið að stýra ríkissjóði. Þegar þingið samþykkir að eyða peningum er það Hvíta húsið sem á að deila þeim út til ríkja, stofnana og samtaka víðsvegar um Bandaríkin.

Það hefur gerst í gegnum árin að forsetar hafa neitað að fylgja eftir fjárútlátum sem þingið hefur samþykkt en eftir miklar deilur milli þings og Richard Nixon á árum áður voru samin sérstök lög. Hann hafði þá reynt að koma í veg fyrir úthlutun margra milljarða dala í ýmis samfélagsverkefni.

Samkvæmt þeim lögum á Hvíta húsið að útskýra fyrir þinginu af hverju það eru tafir á úthlutun peninga og þingið þarf að veita töfum til lengri tíma samþykki.

AP segir útlit fyrir að áðurnefnd skipun Trumps hefði farið fyrir Hæstarétt Bandaríkjanna, eins og deilurnar í forsetatíð Nixons gerðu. Þá voru allir dómarar sammála um að forsetinn hefð mætti ekki stöðva úthlutun peninga sem þingið hafði samþykkt.

Fréttin hefur verið uppfærð.