Enginn þreyir þorrann eins og Áslaug Arna

Magnús Jochum Pálsson skrifar 26. janúar 2025 00:06

Áslaug Arna er ötul í blótinu. Hún hlýtur að reyna við fjögur þorrablót á átta dögum á næsta ári.

Áslaug Arna Sigurbjörnsdóttir mætti á þrjú þorrablót á síðustu átta dögum sem er eftirtektarverð mæting. Áslaug er sögð munu tilkynna framboð sitt til formanns Sjálfstæðisflokksins á morgun.

Það styttist í landsfund Sjálfstæðisflokksins og er ljóst að formaðurinn Bjarni Benediktsson og varaformaðurinn Þórdís Kolbrún R. Gylfadóttir munu bæði hverfa á braut.

Þrír hafa verið orðaðir einna mest við embættið: Áslaug Arna Sigurbjörnsdóttir, Guðlaugur Þór Þórðarson og Guðrún Hafsteinsdóttir. Þau tvö síðarnefndu segjast vera að íhuga málið en Áslaug hefur unnið að framboði sínu í nokkurn tíma og mun tilkynna það á fundi á morgun.

Fylkiskona meðal KR-inga

Áslaug hefur verið á útopnu félagslega upp á síðkastið og verið tíður gestur á hinum ýmsu viðburðum.

Þann 19. janúar mætti hún á þorrablót Vesturbæjar sem þótti eftirtektarvert í ljósi þess að hún er uppalin í Ártúnsholtinu og er gallhörð Fylkiskona.

Blaðamaður Mannlífs gekk svo langt að segja að „engum sönnum Fylkismanni myndi detta í hug að láta sjá sig þar“ og hún gæti varla „kallað sig stuðningsmann félagsins eftir „svik“ sem þessi…“

En mætingin á vesturbæjarblótið var þó bara upphafið að þorratörn Áslaugar.

Blótaði í Kópavogi

Næst sást til Áslaugar á stærsta þorrablóti landsins sem fór fram í Kórnum föstudaginn 24. janúar. Þar hefur hún skemmt sér konunglega með HK-ingum og Blikum.

Kópavogurinn hefur verið sterkt vígi Sjálfstæðismanna undanfarna áratugi og hefur flokkurinn verið í bæjarstjórn samfleytt frá 1990.

Áslaug stillti sér þar upp á mynd með Ásdísi Kristjánsdóttur bæjarstjóra og Þórdísi Kolbrúnu, fráfarandi varaformanni, sem býr í Kópavoginum.

Áslaug, Þórdís, Ásdís og vinkona þeirra.

Þórdís Kolbrún var lengi orðuð við formannsstólinn en greindi frá því á fimmtudag að hún sæktist ekki eftir neinu embætti.

Sjá einnig: Þórdís Kolbrún gefur ekki kost á sér

Þórdís og Áslaug eru sagðar tilheyra svokölluðum Bjarna-armi flokksins en hinn stóri armurinn er kenndur við Guðlaug Þór. Nú þegar Bjarni virðist á leið úr stjórnmálum er ekki lengur hægt að kenna arminn við hann. Áslaugar-armur er þá líklega að verða til og hann fer greinilega ekki tvístraður á landsfund.

Mosó síðasti viðkomustaður

Þriðja og síðasta þorrablót Áslaugar var svo í kvöld í Mosfellsbænum á vegum Ungmennafélagsins Aftureldingar.

Áslaug birti fjölda mynda af sér frá blótinu, þar á meðal með oddvita Sjálfstæðisflokksins í Mosó, Ásgeiri Sveinssyni og með þingflokkskollega sínum Bryndísi Haraldsdóttur.