Af­nema tíma­bundið réttinn til að óska hælis

Samkvæmt alþjóðalögum ber ríkjum að heimila einstaklingum að óska hælis og ekki liggur fyrir hvernig Tusk, fyrrverandi forseti leiðtogaráðs Evrópusambandsins, hyggst réttlæta ákvörðunina út á við.

Stjórnvöld í Varsjá hafa sakað Rússland og Belarús um að vopnavæða hælisleitendur með því að beina þeim til aðildarríkja Evrópusambandsins. Bæði ríki hafa neitað ásökununum.

Tusk greindi frá því í dag að hann myndi kynna nýja stefnu stjórnvalda í útlendingamálum þann 15. október næstkomandi en hún myndi meðal annars fela í sér að rétturinn til að óska hælis yrði felldur úr gildi tímabundið.

„Ég mun krefjast þess, krefjast viðurkenningar Evrópu á þessari ákvörðun,“ sagði forsætisráðherrann. Hann sagði ráðamenn í Belarús og Moskvu, og glæpamenn í mansali, hafa misnotað flóttamannastrauminn gegn öðrum Evrópuríkjum og að Pólverjar þyrftu að endurheimta ákvörðunarvaldið yfir því hverjir kæmu inn í landið.

Tusk hefur vikið frá stefnu íhaldsmanna í ýmsum málum eftir að hann komst aftur til valda í fyrra en kom mörgum á óvart með því að halda sig vð stefnumörkun þeirra í útlendingamálum. Skoðanakannanir hafa enda sýnt að mikill meirihluti Pólverja er fylgjandi harðari stefnu í málaflokknum.