Ísak Berg­mann kom Düsseldorf til bjargar

Ísak Bergmann og Valgeir Lunddal Friðriksson voru báðir í byrjunarliði Düsseldorf sem komst yfir í leiknum en Greuther Fürth jafnaði metin áður en fyrri hálfleik var lokið. Það stefndi allt í að leikurinn myndi enda með 1-1 jafntefli en Íslendingaliðið fékk vítaspyrnu undir lok leiks.

Ísak Bergmann steig á punktinn og tryggði Düsseldorf mikilvæg þrjú stig. Ísak Bergmann lék allan leikinn á miðsvæðinu á meðan Valgeir Lunddal var tekinn af velli þegar tíu mínútur lifðu leiks.

Með sigrinum fer Íslendingaliðið á topp deildarinnar með 17 stig að loknum sjö leikjum en Karlsruher SC getur jafnað Düsseldorf að stigum með sigri um helgina.