Hjalti Már tekur við af Hreiðari Þór hjá Datera

Frá þessu segir í tilkynningu frá Datera en fyrirtækið sérhæfir sig í ráðgjöf í gagnadrifinni markaðssetningu og birtingum.

Fram kemur að Hjalti hafi gengið til liðs við Datera haustið 2021 sem viðskiptaþróunarstjóri og hafi leitt sókn Datera inn á nýja markaði og sinnt strategískri ráðgjöf til viðskiptavina. Hann tók við sem framkvæmdastjóri Datera í byrjun september en hjá fyrirtækinu starfa þrettán manns.

Hreiðar Þór mun áfram sitja í stjórn Datera auk þess að sinna sértækum verkefnum á sviði ráðgjafar og birtinga.

„Hjalti Már Einarsson hefur starfað sem viðskiptaþróunarstjóri hjá Datera frá 2021. Áður var hann forstöðumaður markaðssviðs Nordic Visitor frá 2009-2021. Hjalti er með MS-gráðu í upp­lýs­inga­tækni og ra­f­ræn­um viðskipt­um frá IT Uni­versitet í Kaup­manna­höfn og Bachel­or-gráðu í stjórn­un og fram­leiðslu miðla frá Den Gra­fiske Höjskole í Kaup­manna­höfn. Hann hef­ur setið í stjórn Sam­taka vefiðnaðar­ins, í fag­hópi vef­stjórn­enda hjá SKÝ og í stjórn körfuknatt­leiks­deild­ar KR.

Hreiðar Þór Jónsson var framkvæmdastjóri Datera frá 2020 til 2024. Hreiðar var sölu- og markaðsstjóri áfengra drykkja hjá Ölgerðinni frá 2018 til 2020 og þar áður markaðsstjóri hjá CCEP frá 2007 til 2017. Áður starfaði Hreiðar hjá Símanum. Hreiðar hefur einnig setið í stjórn og gegnt ýmsum trúnaðarstörfum hjá ÍMARK,“ segir í tilkynningunni.