Snorri Dagur vara­maður inn í undanúrslitin

Jóhanna Elín Guðmundsdóttir synti á tímanum 25,91 sekúndum í 50 metra skriðsundi sem er alveg við hennar besta tíma sem er 25,86 sek. Jóhanna Elín varð í 22. sæti af 42 keppendum en þetta var mjög fínt sund hjá Jóhönnu Elínu.

Snorri Dagur Einarsson synti 50 metra bringusund á tímanum 28,10 sekúndum sem er örlítið frá hans besta tíma sem er 27,89 sek. Hann er annar varamaður inn í undanúrslitin sem fram fara í kvöld og er sem stendur í 18. sæti. Mjög gott sund hjá Snorra Degi.

Einar Margeir Ágústsson synti einnig 50 metra bringusund í morgun og hann bætti tíma sinn síðan í janúar og kom í mark á 28,19 sekúndum. Gamli besti tíminn hans var 28,31 sek. Einar Margeir varð í 24. sæti af 40 keppendum í greininni. Mjög flott bæting hjá Einari.

Nú verður spennandi að sjá hvort að einhverjir sundmenn skrái sig úr 50 metra bringusundi svo að Snorri Dagur fái að keppa aftur í kvöld. Annars hafa þessi þrjú lokið keppni á EM50 í Belgrad.

Ísland á keppendur í fyrramálið, en þá syndir Símon Elías Statkevicius 50 metra skriðsund og Birgitta Ingólfsdóttir syndir 50 metra bringusund.