Swiatek sigraði Opna franska þriðja árið í röð

Þetta er þriðja árið í röð sem Swiatek fagnar sigri á mótinu og í fjórða sinn á síðustu fimm árum.

Swiatek, sem trónir á toppi heimslistans í tennis, vann öruggan sigur gegn hinni ítölsku Jasmine Paolini, sem situr í 12. sæti listans.

Swiatek tók sér rétt rúman klukkutíma í að sigra Paolini og vann loturnar 6-2 og 6-1. Þessi 23 ára pólska tenniskona hefur nú tryggt sér fimm risatitla á ferlinum, en ásamt sigrunum fjórum á Opna franska sigraði hún einnig Opna bandaríska árið 2022.

Hún er aðeins þriðja tenniskonan í sögunni á eftir Monicu Seles og Justine Henin til að vinna sama risamótið þrjú ár í röð.