Fram­kvæmda­stjórn ESB gefur Úkraínu grænt ljós

Financial Times greinir frá þessu og hefur eftir heimildarmönnum innan sambandsins að framkvæmdastjórnin hafi í hyggju að koma aðildarviðræðum af stað áður en Ungverjar taka forsæti innan leiðtogaráðsins, sem bauð bæði Úkraínu og Moldóvu að hefja viðræður um inngöngu í lok síðasta árs. 

Úkraína sótti um aðild að ESB í kjölfar innrásar Rússa í Úkraínu í febrúar 2022. Úkraína hlaut stöðu umsóknarríkis á mettíma í júní það ár. 

Financial Times greinir frá því að framkvæmdastjórnin telji Úkraínu uppfylla þau skilyrði sem sett voru fyrir viðræðum, þar á meðal um vernd gegn spillingu og hagsmunaskrá opinberra starfsmanna, svo eitthvað sé nefnt.

Georgía sem hlaut stöðu umsóknarríkis á síðasta ári, uppfyllir hins vegar ekki skilyrðin. Georgía samþykkti nýverið umdeild fjölmiðlalög sem gagnrýnendur telja þrengja mjög að frelsi fjölmiðla.