Tuttugu sendlar Wolt eiga yfir höfði sér kæru

Lillý Valgerður Pétursdóttir skrifar 31. maí 2024 13:48

Fyrirtækið hóf starfsemi hér á landi fyrir um ári og byrjaði þá að bjóða upp á heimsendingar til að mynda með mat og hafa umsvif fyrirtækisins vaxið hratt. Mika Baumeister

Um tuttugu manns sem afhent hafa sendingar á vegum Wolt eiga yfir höfði sér kæru fyrir að starfa án atvinnuréttinda hér á landi. Lögreglan segir ábyrgð atvinnurekenda í málum sem þessa töluverða.

Lögreglan á höfuðborgarsvæðinu hefur við eftirlit undanfarna daga haft afskipti af útlendingum sem voru við störf hér á landi án þess að vera með atvinnuréttindi.

Ásmundur Rúnar Gylfason aðstoðaryfirlögregluþjónn hjá Lögreglunni á höfuðborgarsvæðinu segir málin hafa komið upp vegna ábendinga og frumkvæðisvinnu lögreglu.

„Síðustu daga hefur lögreglan verið í eftirliti. Eftirlitið hefur meðal annars snúist að hugsanlegum brotum um útlendinga og lögum um atvinnuréttindi útlendinga. Úr þessu eftirlitið hefur komið að um tuttugu einstaklingar eiga nú yfir höfði sér kæru.“

Þá var hald lagt á fjögur ökutæki í tengslum við þessi mál.

Fram kemur í tilkynningu frá lögreglunni að fólkið hafi verið að vinna þjónustustörf þegar til afskiptanna kom en ekkert um á hvaða vegum fólkið var. Samkvæmt heimildum fréttastofu var fólkið að fara með sendingar fyrir fyrirtækið Wolt.

Fyrirtækið hóf starfsemi hér á landi fyrir um ári og byrjaði þá að bjóða upp á heimsendingar til að mynda með mat og hafa umsvif fyrirtækisins vaxið hratt.

Samkvæmt heimildum fréttastofu er í einhverjum tilfellum um að ræða það að þeir sem hafa skráð sig til að sendast fyrir Wolt hafi fengið aðra til að sinna sínum verkefnum. Þannig hafa þeir sem skrá sig verið með atvinnuréttindi en ekki þeir sem sjá svo um að sendast.

Ásmundur segir bæði sektir og fangelsisdóma liggja við brotum sem þessum bæði fyrir fólkið og atvinnurekandann.

„Svo náttúrulega liggur ábyrgðin hjá atvinnurekendum ekki síður að tryggja það að starfsmenn hafi leyfi til þess að starfa.“

Uppfært klukkan 15:30

Í skriflegu svari til fréttastofu frá Wolt segir að áður en fólk sé ráðið til starfa hjá Wolt séu vegabréf og ökuskírteini umsækjenda skoðuð auk þess sem sýna þurfi fram á atvinnuleyfi. Það geti þó gerst að þeir sem ráði sig til starfa úthýsi verkefnum til annarra sem hafi ekki tilskilin leyfi. Það séu brot á samningi við Wolt. Þá er lögð áhersla á að eftir því sem stjórnendur fyrirtækisins komist næst sé Wolt ekki til rannsóknar.

Yfirlýsingu frá Wolt í heild sinni má sjá að neðan.

Yfirlýsing frá Wolt vegna ólöglegrar samnýtingar í verktöku

Undir vissum kringumstæðum er heimilt að deila samningum í verktöku. Eins og hjá öðrum þjónustuveitendum geta sendlar í verktöku útvistað verki svo lengi sem við erum upplýst um það.

Ólögleg samnýting reikninga getur hins vegar átt sér stað, þar sem samningsbundinn verktaki áframselur verkið til óvottaðs einstaklings. Þetta er samningsbrot og mun leiða til tafarlausrar uppsagnar samnings hjá Wolt.

Okkur hefur verið gert kunnugt um að íslenska lögreglan hafi kallað nokkra verktaka sem hafa sinnt störfum sendla til yfirheyrslu vegna atvinnuréttinda þeirra hér á landi. Allir samningsbundnir verktakar hafa veriđ yfirfarnir og vottaðir hjá Wolt áđur en þeir geta farið að sendast í kerfi Wolt. Áður en fólk getur stundað verktöku sem sendlar fyrir Wolt athugum við skilríki, vegabréf og ökuskírteini og erlendir ríkisborgarar verða að framvísa atvinnuleyfi. Við erum sem stendur búin að þróa, og erum að prófa, andlitsgreiningu í appinu fyrir sendla í Finnlandi. Við vonumst til að koma þessu líka í gagnið á Íslandi í náinni framtíð.

Það skal tekið fram að Wolt sætir ekki rannsókn, eftir því sem við best vitum. Ekkert yfirvald á Íslandi hefur haft samband við okkur vegna verktanna sem sinna þessum störfum. Við munum hins vegar með ánægju vinna með lögreglu eða öðrum yfirvöldum, og höfum sett okkur í samband við viðeigandi yfirvöld og hjálpum öðrum yfirvöldum ef þau hafa samband. Við fögnum að tekið sé á brotum í tengslum við atvinnuréttindi með þessum hætti.

Við getum staðfest að deiling reikninga með þessum hætti er mjög sjaldgæf og flestir sendlar eru harðduglegir og heiðarlegir, og við höfum því enga ástæðu til að vantreysta þeim. Sem fyrirtæki þá njótum við ekki ávinnings af óleyfilegum deilingum á reikningum innan Wolt enda býður slíkt hættunni á misnotkun heim auk þess sem það truflar þjónustu okkar. Forgangur okkar er á þróun tækninnar, vettvangs umhverfið og framkvæmd svo við getum tryggt að Wolt sé örugg þjónusta fyrir alla, segir Elisabeth Stenersen framkvæmdastjóri Wolt á Íslandi og Noregi.

Vinnumarkaður Lögreglumál Veitingastaðir Heimsendingarþjónusta