Á­standið í Hafnar­firði geti haft lang­varandi á­hrif á börn

Fyrsta atvikið átti sér stað við Víðistaðatún í upphafi mánaðar. Viku síðar kom upp mál við Engidalsskóla, fyrir rúmri viku var karlmaður sagður hafa elt barn og boðið því nammi. Síðastliðinn miðvikudag veittist svo maður að stúlku á göngustíg skammt frá Víðistaðaskóla.

„Það koma áfallaeinkenni í þessi börn,“ segir Theódór og að þau geti haft verulega mikil áhrif á þroska þeirra og sjálfsmyndarþroska þeirra. Theódór segist hafa rætt við foreldra sem hafa keypt piparúða fyrir barnið sitt vegna mikils ótta. Theódór fór yfir þessi mál í Bítinu á Bylgjunni í morgun.

Theódór segir áríðandi fyrir foreldra að ræða við börnin sín um það sem er í gangi. Þá sé hægt að komast að því hvaða áhrif það hefur haft á þau og hvort þau komist í gegnum það. Ef barnið er ekki að því þá þurfi að leita til heilsugæslu eða einkarekinna stofa og fá faglega aðstoð.

„Óttinn verður svo mikill. Getur þetta komið fyrir mig? Og krakkarnir sem hafa lent í þessu, þau þurfa hundrað prósent á faglegri aðstoð að halda,“ segir Theódór og þá skipti engu máli hversu vandaðir, góðir, nákvæmir eða vel meinandi foreldrar þeirra eru.

Mikilvægt að leita aðstoðar

„Ef ég handleggsbrýt mig þá er alveg sama hvað ég er með gott bakland. Höndin er samt brotin, og þarna er brotið á þessum krökkum,“ segir Theódór og að það verði að grípa þau.

Theódór segir að þótt svo það sé eðlilegt að fræða börn um ýmsar hættur sem gætu leynst í samfélaginu þá sé það sem hafi gerst hér, að karlmaður ráðist á börn og taki þau hálstaki, langt út fyrir það. Þetta mál sé svo alvarlegt að viðbrögðin séu ekki „móðursýki“.

„Það gengur einhver um og misbeitir börnum.“

Theódór segir gott fyrir foreldra í öðrum hverfum líka að ræða við börn sín um það sem er að gerast í Hafnarfirði. Börn lesi fréttir og séu á samfélagsmiðlum. Mörg séu þau eflaust meðvituð um það sem hafi gerst og atvikin líklega í umræðu meðal þeirra.

„En það má tala um að þetta séu undantekningar. Umhverfið á Íslandi er ekki orðið svona hættulegt,“ segir hann og að það megi kenna börnum einhver grundvallarviðbrögð lendi þau í slíkum aðstæðum.

Theódór segir tvennt skipta máli í svona málum. Að fjölskyldur tali saman um svona mál en að þau tali líka um það sem sé gott og gangi vel. 

„Þetta læknar sig ekki sjálft,“ segir Theódór og að það sé alveg öruggt að ef það er ekki tekið á því áfalli sem þetta getur valdið börnum í dag þá muni það valda þeim ómældum skaða.

Enn ekki búið að finna manninn

Skúli Jónsson aðstoðaryfirlögregluþjónn segir lögreglu enn ekki búna að hafa uppi á manninum sem réðst á stúlkuna. Alls er lögreglan í Hafnarfirði með til rannsóknar fjögur tilvik þar sem karlmaður veittist að börnum. Skúli segir ekki vitað hver það er eða hvort það hafi verið sami einstaklingurinn.

„Við vitum ekkert hvort hann komi annars staðar frá eða hvort hann komi aftur. Kannski er hann farinn. Við erum með þetta í rannsókn og leggjum áherslu á að upplýsa þetta,“ segir Skúli.

Lögregla hefur síðustu daga verið með aukið eftirlit vegna tilvikanna auk þess sem foreldrar í skólunum í hverfinu sinna virku eftirlit.

Hvað varðar forvarnir og umræðu við börn segir hann mikilvægt að foreldrar ræði við börn sín en segir hvorki börnum né foreldrum heimilt að ganga um með piparúða.

„Þetta er auðvitað snúið en foreldrar þurfa að ræða við börn sín um þetta og þau tilvik sem hafa komið upp.“

Hann segir viðbrögð barnanna í þessum tilvikum sem eru til rannsóknar hafa verið til fyrirmyndar. Þar sem ráðist var á stúlku og hún tekin hálstaki beit hún í hönd árásarmannsins, sparkaði í hann og gaf honum olnbogaskot til að losa sig. Í öðru tilviki, þar sem stúlku var boðið nammi og hún elt, hljóp hún í burtu.

„Þetta var mjög vel gert. Það er margslungið að ræða við börnin en það fer auðvitað eftir aldri þeirra og þroska hvað á að segja,“ segir Skúli. Það sé gott að ítreka að gott sé að flýja aðstæður sem þau óttast og leita til fullorðinna með það.