Segja Ísraelum að draga úr hernaði á Gasa

Ísraelar eiga einnig að leyfa sendingar neyðaraðstoðar til Gasastrandarinnar og refsa fólki sem hvetur til þjóðarmorðs á Palestínumönnum. Þá hefur þeim verið gert að vernda sönnungargögn.

Einnig var kröfu Ísraela um að máli Suður-Afríku yrði vísað frá hafnað.

Vonast er til þess að úrskurðurinn setji meiri þrýsting á Ísraela um að vinna að vopnahléi og sami þrýstingur nái til bandamanna Ísraels. Dómstólinn sagði Ísraelum þó ekki að láta af hernaði eða hörfa frá Gasaströndinni.

Úrskurðar dómstólsins eru bindandi en dómstóllinn hefur ekkert vald til að fylgja þeim eftir og þvinga ríki til að fylgja úrskurðunum eftir. Ísraelar eiga sér þar að auki langa sögu í að fylgja ekki eftir úrskurðum sem þessum og að afneita rannsóknum Sameinuðu þjóðanna og annarra.

Itamar Ben-Gvir, öryggismálaráðherra Ísrael, skrifaði færslu á X (áður Twitter) þar sem hann segir: „Haag Smaag“,  lauslega þýtt.

Sami dómstóll komst að þeirri niðurstöðu á árum áður að tilkall yfirvalda í Kína til nánast alls Suður-Kínahafs væri ólöglegur en Kínverjar hafa ekki fylgt þeim úrskurði að nokkru leyti.

Sjá einnig: Kína á ekki sögulegan yfirráðarétt

Suður-Afríka hefur sakað Ísraela um þjóðarmorð á Gasaströndinni og eru þau mál yfirstandandi. Lögmenn Suður-Afríku óskuðu þess svo að dómstóllinn myndi til bráðabirgða úrskurða um það að Ísraelar láti af hernaði sínum á Gasa á meðan dómstóllinn tekur fyrir ásakanir þeirra um þjóðarmorð.

Í úrskurðinum segir að dómarar hafi áhyggjur af því að haldi hernaður Ísraela áfram muni ástandið á Gasa versna til muna, áður en hægt verði að komast að niðurstöðu um hvort að þjóðarmorð sé að ræða eða ekki.

Niðurstöðu um hvort að um þjóðarmorð sé að ræða er ekki, er ekki að vænta á næstunni. Málaferlin gætu staðið yfir um árabil.

Minnst 26 þúsund liggja í valnum

Hernaður Ísraela gegn Hamas-samtökunum hefur leitt til dauða að minnsta kosti 26 þúsund Palestínumanna á Gasaströndinni og þar á meðal eru fjölmargir óbreyttir borgarar. Heilbrigðisyfirvöld á Gasa, sem Hamas-samtökin stýra, segja tvo þriðju hinna látnu vera konur og börn. Nánast allir íbúar Gasa hafa þurft að flýja heimili sín og hafa ekki aðgang að flestum nauðsynjum.

Ísraelar segja að minnst níu þúsund Hamas-liðar séu meðal hinna látnu.

Fulltrúar beggja ríkja báru vitni fyrir dómstólnum fyrir um tveimur vikum og mótmæltu Ísraelar ásökunum Suður-Afríkumanna um þjóðarmorð af miklum ákafa og óskuðu þess að málið yrði ekki tekið fyrir í dómstólnum. Fulltrúar þeirra sögðu Ísraela eiga rétt á því að verja sig og vísuðu til árásar Hamas-liða þann 7. október þar sem 1.300, meðal annars almennir borgarar í Ísrael, voru myrtir.

Sjá einnig: Án að­gerða verði út­rýming palestínsku þjóðarinnar al­gjör

Með því fyrsta sem kom fram er farið var yfirr úrskurð dómstólsins í dag var að kröfu Ísraela um að málinu yrði vísað frá hefði verið hafnað. Málið verði tekið fyrir.