Segja Stefán Teit á förum frá Sil­ke­borg

Frá þessu greinir staðarmiðillinn Sport Silkeborg. Þar segir að efstu deildarfélagið hafi boðið Skagamanninum framlengingu á samningi hans en leikmaðurinn hafi ákveðið að hafna því og sé á förum, annað hvort verði hann seldur í sumar eða fari frítt þegar samningurinn rennur út í desember.

Silkeborg byrjaði tímabilið mjög vel og skoraði Stefán Teitur til að mynda þrennu í óvæntum stórsigri á Lyngby. 

Liðið féll þó niður töfluna áður en danska úrvalsdeildin fór í sína hefðbundnu vetrarpásu og sem stendur er Silkeborg í 6. sæti með 27 stig, níu stigum minna en topplið Midtjylland.

Hinn 25 ára gamli Stefán Teitur á að baki 19 A-landsleiki og bar til að mynda fyrirliðaband Íslands síðustu tuttugu mínúturnar í sigrinum á Gvatemala fyrr í þessum mánuði.