Vopnahléstillagan sam­þykkt og Ís­land kaus með

Bjarni Benediktsson utanríkisráðherra staðfesti við fréttastofu í dag að Ísland styðji við tillöguna, sem var lögð fram af tveimur Afríkuríkjum, Egyptalandi og Máritaníu. 

Í lok október samþykkti allsherjarþingið ályktun um tafarlaust vopnahlé á svæðinu. Í þeirri atkvæðagreiðslu var Ísland eitt af 45 ríkjum sem sátu hjá en 120 ríki greiddu þar atkvæði með ályktuninni.

Hjáseta Íslands olli talsverðri ólgu en þingmaður Pírata sagði afstöðu Íslands aumingjalega. Þá sendi þingflokkur Vinstri grænna frá sér yfirlýsingu þar sem hann tjáði að Ísland hefði átt að samþykkja ályktunina. 

Atkvæðagreiðslunni lauk fyrr í kvöld. Eins og búast mátti við greiddu Bandaríkin atkvæði gegn tillögunni, auk Austurríkis, Tékklands, Gvatemala, Ísrael, Líberíu, Míkrónesíu, Naúrú, Papúa nýju Gíneu og Paragvæ. Niðurstöður atkvæðagreiðslunnar má sjá hér að neðan. 

Katrín Jakobsdóttir greindi frá atkvæðagreiðslunni á Facebook síðu sinni. Þar segir hún Ísland hafa verið meðflutningsaðila tillögunnar sem að hennar sögn er nauðsynlegt að raungerist tafarlaust.