Þjálfari FCK orðaður við Ajax

FC Kaupmannahöfn vann tvöfalt á síðustu leiktíð og gæti gert slíkt hið sama aftur en liðið trónir á toppi dönsku úrvalsdeildarinnar og er komið í 16-liða úrslit bikarsins. Þá á liðið ágætis möguleika á að komast áfram í 16-liða úrslit Meistaradeildar Evrópu.

Hinn 35 ára gamli Neestrup er aðeins á sínu öðru tímabili sem aðalþjálfari FCK en hann tók við liðinu eftir slaka byrjun og stýrði því til sigurs í deild og bikar. Hann var spurður út í orðrómana fyrir leik helgarinnar gegn Viborg.

„Ég ætla ekki að tjá mig um það sem fjölmiðlar skrifa. Leikmenn félagsins verða að einbeita sér að FCK og það sama á við um mig,“ sagði Neestrup um orðróminn.

Einn af leikmönnum liðsins segir þó næsta öruggt að Ajax gæti nýtt þjálfara á borð við Neestrup. Hinn 31 árs gamli Boilesen var á mála hjá Ajax frá 2010 til 2016.

Hann segir að Neestrup ætli sér stóra hluti með FCK en gæti vel stýrt Ajax enda ungur og nútímalegur þjálfari. Fari svo að Neestrup skipti yfir til Hollands þá er Boilesen klár í að aðstoða hann með hollenskuna.

Landsliðsframherjinn Orri Steinn Óskarsson spilar með FCK á meðan miðjumaðurinn Kristian Nökkvi Hlynsson, sem spilaði sinn fyrsta A-landsleik á dögunum, spilar með Ajax.