Erlent

Flytja ný­bura af spítalanum sem enn er án raf­magns

Lovísa Arnardóttir skrifar
Myndin er tekin á Nasser spítalanum í Khan Yunis á Gasa í nótt.
Myndin er tekin á Nasser spítalanum í Khan Yunis á Gasa í nótt. Vísir/Getty

Starfsfólk á stærsta spítala Gasa, al-Shifa, segja sjúklinga og fólk á flótta fast í hræðilegu ástandi á meðan átök fara fram í nærliggjandi götum. Ísraelsher segist ætla að aðstoða við flutning nýbura af spítalanum í dag. Átök hafa geisað við spítalann í tvo daga. 

Ekkert vatn er á al-Shifa spítalanum, matur eða rafmagn. Tvö börn eru sögð látin í kjölfar þess að rafmagn fór af, eitt var í öndunarvél og annað í hitakassa. Læknar spítalans segja 20 börn til viðbótar í viðkvæmri stöðu sem voru í meðferð á nýburadeild spítalans. 

Ísraelar hafa lýst því yfir að hægt verði að flytja börnin á annan spítala síðar í dag. Talsmaður ísraelska hersins sagði spítalann hafa óskað eftir aðstoð og að Ísraelsher myndi veita þeim hana.

Á vef BBC segir að þeim hafi verið sendar myndir af 20 nýburum á skurðstofu en þau voru flutt þangað eftir að rafmagn fór af bráðamóttöku nýburadeildarinnar. Samtök lækna á svæðinu hafa varað við því að ef ekkert verði gert geti 37 nýburar til viðbótar dáið.

Þá kemur einnig fram á vref BBC að frásagnir frá fólki á spítalanum séu hryllilegar. Þar sé reglulega slegist, sjúklingar sem hafi farið í aðgerð geti ekki farið og að lík þeirra sem látin eru hlaðist upp án þess að hægt sé að jarða þau. Eftir að rafmagn fór af kælum þar sem líkin eru geymd óttast læknar um smit og sjúkdóma.

Hamas vinni undir spítalanum

Þúsundir hafa leitað skjóls í spítalanum en þar hafa geisað hörð átök síðustu tvo daga. Ísraelsher hefur ítrekað sakað Hamas um starfrækja höfuðstöðvar sínar undir spítalanum, en Hamas segir það ekki rétt. Alþjóðleg mannréttindasamtök hafa mörg fordæmt átökin á og við spítalann.

Átökin á Gasa hafa nú geisað í meira en mánuð. Allt frá því að Hamas réðst inn í Ísrael, myrti um 1.200 manns og tók 200 gísla. Frá þeim tíma hefur Ísraelsher myrt um 11 þúsund almenna borgara í Palestínu í árásum sínum. Um helmingur þeirra sem látin eru á Gasa eru börn.

Ekkert vopnahlé án þess að gíslum sé sleppt

Netanyahu hefur hingað til ekki viljað samþykkja vopnahlé nema að öllum 239 gíslum Hamas sé sleppt en hann ítrekaði það í ávarpi í sjónvarpi í gær.

„Stríðið gegn Hamas heldur áfram af fullum krafti, og það er aðeins eitt markmið, að vinna. Það er enginn annar valmöguleiki en að sigra,“ sagði hann í ávarpi sínu.

Palestína Átök í Ísrael og Palestínu

Tengdar fréttir

Ekkert bendir til að blaðamenn á Gasa hafi vitað af árásunum

Framkvæmdastjóri HonestReporting segir samtökin aðeins hafa verið að velta upp spurningum þegar þau ýjuðu að því að palestínskir blaðaljósmyndarar hafi vitað af árás Hamas á Ísrael þann 7. október fyrir fram. Ekkert bendi til að ljósmyndararnir hafi vitað af árásinni fyrirfram. 

Hamas og aðrir vopnaðir hópar verði að leysa gísla úr haldi

Amnesty International ítrekar ákall sitt um að óbreyttir borgarar í gíslingu á hernumdum svæðum á Gaza verði leystir úr haldi án tafar og skilyrðislaust. Á meðal gísla eru börn. Hamas og aðrir vopnaðir hópar hafa haldið þeim í gíslingu í mánuð eða frá 7. október.

Netanyahu segir Ísraela hvorki vilja sigra, hernema né stjórna Gasa

Benjamin Netanyahu segir Ísrael ekki hafa í hyggju að sigra, hernema né stjórna Gasa eftir að stríðinu við Hamas lýkur. Hins vegar þurfi að tryggja að hægt sé að senda „trúverðugt afl“ inn á svæðið ef nauðsyn krefur, til að hindra uppgang hryðjuverkasamtaka.

Segja Ísraela hafa samþykkt tímabundin hlé

Ríkisstjórn Ísrael hefur samþykkt að hætta árásum á Gasaströndina í fjórar klukkustundir á degi hverjum. Með þessu er vonast til þess að fleiri óbreyttir borgarar geti flúið frá norðurhluta Gasa, þar sem barist er á götum Gasaborgar og annarra byggða.

Mest lesið


Fleiri fréttir

Sjá meira


×

Mest lesið