Þór­hildur ráðin fram­kvæmda­stjóri Brúar Stra­tegy

Þórhildur hefur undanfarin tvö ár starfað sem kynningarstjóri BHM þar sem hún hefur leitt fjölmiðlasamskipti og almannatengsl, endurmörkun bandalagsins og stefnumótun í kynningarmálum. Þetta segir í tilkynningu um vistaskiptin.

Þar segir að Þórhildur hafi starfað sem vaktstjóri og fréttamaður á fréttastofum RÚV, Stöðvar 2, Vísis og Bylgjunnar í áratug. Þá hafi hún sinnt þáttastjórnun og fjölbreyttri dagskrárgerð í sjónvarpi og útvarpi auk þess að halda úti vinsælu hlaðvarpi. 

Þórhildur hlaut blaðamannaverðlaun ársins 2020. Hún er fjölmiðlafræðingur að mennt og hefur kennt samskipti og framkomu í fjölmiðlum, bæði á háskólastigi og á námskeiðum.

Brúa bilið milli stefnumótunar og markaðsmála

Þá segir að Brú Strategy hafi verið stofnað árið 2021 með það að leiðarljósi að brúa bilið milli stefnumótunar og markaðsmála. Fyrirtækið sérhæfi sig í stefnumótun, viðskiptaþróun, árangursdrifnum markaðsmálum og áunninni umfjöllun fyrir fyrirtæki í sókn bæði hér á landi og erlendis. 

Brú Stúdíó sérhæfi sig í hönnun og skapandi útfærslu á markaðsefni. Brú sé í samstarfi við Golin Group, stórt samskiptafyrirtæki með starfsemi um allan heim. Aðaleigendur Brú séu Atli Sveinsson, Halldór Harðarson og Darri Atlason.

„Það er gríðarmikill fengur að fá Þórhildi til liðs við okkur. Brú hefur vaxið hratt á stuttum tíma og unnið með breiðum hópi viðskiptavina, allt frá nýsköpunarfyrirtækjum yfir í stór og rótgróin fyrirtæki sem skráð eru á markað. Fram undan eru markviss sóknarfæri þar sem við munum nýta okkar sérþekkingu á sviði hönnunar, almannatengsla og auglýsingagerðar auk þess að setja aukið púður í víðtæk ráðgjafarverkefni bæði hér á landi og erlendis. Þórhildur kemur inn með verðmæta reynslu og sérþekkingu á fjölmiðlasamskiptum og ráðning hennar er liður í að styrkja enn frekar þjónustu við okkar viðskiptavini. Hún mun leiða fyrirtækið inn í nýja og spennandi tíma,“ er haft eftir Halldóri í tilkynningu.