Silja Mist tekur við markaðs­sviði N1

Silja Mist útskrifaðist með B.Sc. gráðu í viðskiptafræði með lögfræði sem aukagrein frá Háskólanum í Reykjavík. Áður hefur hún starfað sem markaðsstjóri Orku Náttúrunnar og Nóa Siríus en þar var hún einnig vöruþróunarstjóri. Auk þess situr hún í stjórn sælgætisgerðarinnar Freyju.

Að því er fram kemur í tilkynningu mun Silja Mist fara fyrir markaðsdeild N1 og bera höfuðábyrgð á auglýsingum og öðru kynningarefni. Þá mun hún einnig hafa samfélagsmál félagsins á sinni könnun.

„Við hjá N1 teljum okkur heppin að hafa fengið Silju Mist til starfa,“ er haft eftir Ými Erni Finnbogasyni, framkvæmdastjóra N1, í tilkynningunni. N1 fái nú að njóta góðs af víðtækri reynslu hennar.

Ýmir segir þá að N1 sé í umbreytingarferli og að mikilvægt sé að vörumerkið þróist í takt við þær breytingar sem eru framundan. „Við erum sannfærð um að Silja Mist sé rétta manneskjan í verkið og hlökkum til samstarfsins.“

Þá segir Silja Mist að það verði skemmtileg áskorun að reyna að höfða til allra þeirra fjölbreyttu hópa sem nýta sér þjónustu félagsins. „Þá hlakka ég mjög til samstarfsins við öll þau ótal félög og samtök sem N1 styrkir árlega með það fyrir augum að gera samfélagið betra, heilbrigðara og farsælla.“