Vika gaslýsingar hjá FIFA

Um tveir mánuðir eru frá því að keppni lauk á heimsmeistaramóti karla í fótbolta í Katar, mót sem sætti töluverðri gagnrýni vegna vals á gestgjöfum vegna mannréttindamála í ríkinu. Ekki síður sætti Gianni Infantino, forseti FIFA, gagnrýni fyrir umtal hans og tengsl við Katar, að ógleymdum búferlaflutningum hans til Katar.

Þá eru flugfélagið Qatar Airways og orkufyrirtækið Qatar Energy á meðal aðalstyrktaraðila FIFA, ásamt Adidas, Coca-Cola og fleiri.

FIFA hefur sætt gagnrýni að nýju í vikunni fyrir aðgerðir meintrar gaslýsingar, í skugga vals á gestgjöfum komandi heimsmeistaramóts félagsliða.

Sambandið hóf vikuna á því að senda stuðningssskilaboð til tékkneska landsliðsmannsins Jakub Jankto, sem kom út úr skápnum á mánudaginn var. Hann er fyrsti virki karlkyns landsliðsmaðurinn í sögunni sem gerir það.

Aðeins degi síðar tilkynnti sambandið svo um nýjan gestgjafa heimsmeistaramóts félagsliða sem fer fram í desember næstkomandi. Sádi-Arabía mun halda mótið og halda þar áfram gífurlegri sókn sinni í íþróttaheiminn.

Sádar verða einnig á meðal helstu styrktaraðila HM kvenna í Ástralíu í sumar þar sem Visit Saudi auglýsingar munu vera áberandi. Knattspyrnuhetjan Alex Morgan gagnrýndi þá ákvörðun í síðustu viku.

Sádar hafa farið mikinn síðustu misseri hvað gestgjafarétti varðar, þar sem Formúla 1, Ofurbikar Spánar og Ítalíu í fótbolta, HM félagsliða í handbolta og LIV golfmótaröðin eru á meðal verkefna. Þá mætti ofurstjarnan Cristiano Ronaldo til Al-Nassr í sádísku deildinni eftir heimsmeistaramótið og er honum ætlað að aðstoða ríkið við að tryggja sér gestgjafarétt HM landsliða karla árið 2030.

Sádar hafa verið sakaðir um stórfelld mannréttindabrot undanfarin ár og eru árlega á meðal efstu þjóða heims hvað aftökur varðar. Mannréttindastaða kvenna er bág og sem og staða hinseginsamfélagsins, sem FIFA lagði sig fram við að styðja með tísti við tilkynningu Jankto á mánudag.

Þá var greint frá því í fyrradag að FIFA hafi tekið starfsviðtöl vegna nýrrar stöðu hjá sambandinu: Yfirmann mannréttinda- og sjálfbærnimála.

Blaðamaðurinn Adam Crafton hjá The Athletic er á meðal þeirra sem hefur gagnrýnt sambandið fyrir gaslýsingartilburði með þessum aðgerðum.

Gaslýsingu eða gaslighting, má lýsa sem tilraunum til að neita sífellt sök, afvegaleiða, setja fram mótsagnir og með því hanna atburðarrás sem ætlað er að verja hagsmuni sína.

FIFA setji því fram mótsagnir í stuðningsyfirlýsingu við Jankto og sköpun nýrrar stöðu mannréttindafulltrúa til að koma ákveðnum pólitískum skilaboðum á framfæri varðandi stöðu sem þeir taki sér með mannréttindamálum. Þessu sé þá ætlað að afvegaleiða umræðu frá afstöðunni sem þeir taka með því að semja við Sádi-Arabíu.