Kofi Tómasar frænda kveður og Ægir tekur við

Um miðjan október á síðasta ári opnaði Ægir brugghús bar við Laugaveg 2. Að sögn Ólafs S. K. Þorvaldz, framkvæmdastjóra og bruggmeistara brugghússins, er staðurinn mun rólegri en forveri hans í húsnæðinu, Kofinn. Þar var ávallt dúndrandi tónlist og opið langt fram á nótt. 

„Þetta er meiri afslöppun og minna djamm. Við erum með opið til klukkan eitt um helgar og ellefu á virkum dögum. Róleg og notaleg tónlist, hægt að spjalla saman án þess að þurfa að öskra,“ segir Ólafur í samtali við fréttastofu. 

Ægir brugghús er einnig með stað úti á Granda á Eyjarslóð, Ægisgarð. Þar er veislusalur og hentar frekar fyrir hópa. Ólafur segir að nýi staðurinn sé betri upp á aðgengi fyrir almenning, þá sérstaklega erlenda ferðamenn sem vilja smakka bjóra Ægis. 

„Við höfum fengið mikið af fyrirspurnum um hvort það sé hægt að koma og smakka. Einstaklingar hafa verið að labba alla leið út á Eyjarslóðina til að koma og nálgast bjórinn okkar. Það var kominn tími til að vera með stað sem maður gæti sent fólk á og haft vöruna aðgengilegri,“ segir Ólafur. 

Túristarnir eru mikill meirihluti viðskiptavina nýja staðarins, þá sérstaklega á virkum dögum. Ólafur segir að áttatíu prósent viðskiptavina séu erlendir ferðamenn. 

„Staðsetningin er frábær upp á það að gera. Þetta eru örugglega fjölförnustu gatnamót Reykjavíkur. Það hefur verið vel tekið í þetta. Svo erum við komin í samstarf við Wake Up Reykjavík. Þau eru að koma með útlendinga til okkar í svona „food and drink tour“. Þetta er búið að ganga mjög vel eftir að við opnuðum,“ segir Ólafur.