Sláandi munur á færni leik­skóla­barna

Sam­kvæmt niður­stöðum rann­sóknarinnar eru 97 prósent fimm ára al­ís­lenskra barna með mun betri ís­lensku­færni en börn sem eiga er­lenda for­eldra og fæðast á Ís­landi.

Þetta eru sláandi niður­stöður að sögn eins rann­sakandans, enda hafi lengi verið talið að er­lend börn sem fæðist á Ís­landi nái fljótt góðum tökum á málinu inni í leik­skólunum.

„Þetta virðist vera al­gengur mis­skilningur að börn læri tungu­mál eins og að drekka vatn. En þetta er erfitt fyrir þau og við verðum að hafa það í huga að það er ekki eins ein­falt og við töldum fyrir þau að læra tungu­málið,“ segir Hjör­dís Haf­steins­dóttir, sem vann rann­sóknina á­samt þeim Jóhönnu T. Einars­dóttur prófessor og Irisi Eddu Nowen­stein, doktors­nema í ís­lenskri mál­fræði. Rann­sóknin er byggð á meistara­verk­efni Hjör­dísar.

Vill íslenskukennslu í leikskóla

Börnin sem tóku þátt í könnunni voru öll fimm ára gömul, í efsta bekk í leik­skóla.

Hjör­dís segir þennan hóp gjarnan gleymast í um­ræðunni. Al­mennt sé litið svo á að önnur kyn­slóð inn­flytj­enda á Ís­landi hafi jöfn tæki­færi og aðrir í sam­fé­laginu.

„Þetta hefur á­hrif á sjálfs­mynd; að börn geti ekki tjáð vilja sinn og skoðanir. Þannig að þau draga sig alveg til hlés. Svo náttúru­lega er það þetta tæki­færi til menntunar. Þau hafa ekki sömu tæki­færi til menntunar eins og ís­lensk börn,“ segir Hjör­dís.

Tví­tyngdu börnin voru marg­falt lík­legri til að eiga erfitt með beygingar, eðli­lega orða­röð innan setninga og höfðu mun verri orða­forða en hin börnin.

Hjör­dís sem sjálf hefur unnið í leik­skóla kallar eftir að­gerðum. Ekki skorti vilja til þess meðal leik­skóla­kennara að auka ís­lensku­kennslu fyrir þennan hóp.

„En hafa kannski ekki tækin til þess eða tæki­færi til þess. Þannig já þetta er eitt­hvað sem þarf að endur­skoða,“ segir Hjör­dís.