Segir marga svekkta sem reyna við fasteignamarkaðinn

Í Bítinu á Bylgjunni í gær kvartaði ósáttur faðir yfir ógagnsæi á fasteignamarkaði. Erfitt sé að vita hvort raunverulega hafi komið hærra tilboð eða hvort fasteignasalar séu að etja fólki saman. Sonur hans sé að reyna að kaupa fyrstu íbúð en tilboð hans nái ekki í gegn. 

Hannes Steindórsson, formaður Félags fasteignasala, ræddi málið í Bítinu í morgun og sagði marga sitja eftir með sárt ennið eins og fasteignamarkaðurinn er í dag. Fimm til tuttugu tilboð berist í hverja fasteign og margir bjóði yfirverð en missi samt af kaupunum.

Lokað söluferli þar sem leynd liggur yfir tilboðum annarra sé þó ekki meinsemdin. Vissulega hafi verið skoðað í nokkurn tíma hvort opna eigi ferlið, líkt og gert er í Svíþjóð og Noregi en það leysi ekki þetta vandamál. Opið söluferli hafi einnig sínar neikvæðu hliðar, til dæmis séu tilboð bindandi og ekki hægt að setja fyrirvara sem geti farið illa og endað með lögsóknum. 

Þau yngri þurfi að keppa við þau eldri

Vandamálið sem kaupendur upplifa nú á fasteignamarkaði snúi að framboðinu og harða baráttu um fáa bita. Fasteignafélögin sem kaupi fimm til tíu prósent íbúða til að setja á leigumarkað skapi ekki þessa stöðu heldur eigi fyrstu kaupendur erfitt með að keppa við eldri kaupendur sem eiga meira eigið fé og geta boðið betur en þeir yngri. 

„Síðastliðin tuttugu ár hefur verið erfitt fyrir fyrstu kaupendur að koma inn á markað. Þrátt fyrir það þá voru sett ný met í fyrra og hittifyrra þar sem fyrstu kaupendur fóru upp í 35 prósent af kaupendum," segir Hannes og bætir við að staðan hafi ekki orðið auðveldari eftir að Seðlabankinn lækkaði lánaheimild fyrstu kaupenda.  

Hannes segir ekki hægt að tala um kólnun á markaði þótt einhverjar breytingar séu í sjónmáli. 

„Það sem hefur gerst er að í staðinn fyrir að það mæti tuttugu pör í opið hús, þá mæta átta. Það er aðeins að lægja," segir Hannes og bætir við máli sínu til stuðnings að nú séu 330 íbúðir í fjölbýli til sölu á höfuðborgarsvæðinu en þær voru 286 fyrir tveimur mánuðum. Þróunin sé hæg en í rétta átt.