Mun stýra Running Tide á Ís­landi

Frá þessu segir í tilkynningu en Running Tide var stofnað fyrir fimm árum síðan á austurströnd Bandaríkjanna og hóf nýverið starfsemi á Íslandi fyrir milligöngu Transition Labs.

„Kristinn Árni starfaði áður sem yfirmaður vörustjórnunar (SVP, Head of Product Management) hjá Sotheby‘s uppboðsfyrirtækinu í New York, þar sem hann leiddi miklar breytingar á skipulagi og tækninotkun þess í samræmi við stefnu nýrra eigenda, en félagið var keypt og afskráð úr bandarísku kauphöllinni NYSE árið 2019 af franska milljarðamæringnum Patrick Drahi. Þar áður var Kristinn Árni framkvæmdastjóri rekstrar hjá hugbúnaðarfyrirtækinu Gangverki, ráðgjafi hjá Kolibri og forstöðumaður rekstrar hjá QuizUp. Kristinn Árni er stofnandi og ritstjóri nýsköpunarvefsins Northstack auk þess að vera formaður stjórnar sprota- og nýsköpunarsjóðsins Kríu. Kristinn Árni er með BS gráðu í viðskiptafræði frá Háskóla Íslands.

Running Tide er framsækið sjávartæknifyrirtæki á sviði kolefnisförgunar. Fyrirtækið hefur þróað tækni til að örva náttúrulega hæfni sjávarins við að fjarlægja kolefni varanlega úr andrúmsloftinu. Markmiðið er að bæta lífríki hafsins og skila ávinningnum beint til sjávarplássa og til að auka sjálfbærni vistkerfa jarðarinnar. Meðal viðskiptavina Running Tide eru alþjóðleg stórfyrirtæki eins og Stripe og Shopify sem fjárfest hafa í kolefnisförgun með þessum nýju aðferðum,“ segir í tilkynningunni.

Fer á fullt í sumar

Ennfremur segir að áformað sé að starfsemi Running Tide hér á landi fari á fullt strax í sumar en hún feli í sér heilmikil umsvif í hafnarstarfsemi, framleiðslu og útgerð. 

„Á meðal fjárfesta að baki félaginu er Davíð Helgason, stofnandi Unity, en hann er einnig stofnandi Transition Labs ásamt Kjartani Erni Ólafssyni frumkvöðli og tæknifjárfesti. Fleiri þekktir alþjóðlegir fjárfestar hafa veðjað á að tækni Running Tide muni skila árangri í baráttunni við loftslagsvandann, en þar má helst nefna einn fremsta vísisjóð heims á sviði loftslagsmála, Lowercarbon Capital, sem var stofnaður af Chris Sacca. Þá má nefna Scott Belsky stofnanda Behance og Caterinu Fake sem stofnaði Flickr, auk fjölda annarra,“ segir í tilkynningunni.

Um Running Tide segir að það hafi verið stofnað af Marty Odler, fjórðu kynslóðar sjómanni, í Maine í Bandaríkjunum. Fyrirtækið þrói ýmis kerfi sem örvi náttúrulega eiginleika hafsins til að farga kolefni, snúa við súrnun sjávar og endurheimta vistkerfi við strendur hafsins.