Neymar settur á sölulista

Eftir að PSG tókst óvænt að sannfæra Kylian Mbappé um að halda kyrru fyrir eru frönsku meistararnir núna búnir að setja Neymar á sölulista. Um þetta fjallar ESPN.

Samningur Neymars gildir til næstu þriggja ára og hann sagðist í síðustu viku vilja halda kyrru fyrir hjá PSG.

Launakostnaður PSG vegna Neymars nemur um það bil 35 milljónum evra á ári, eða 4,8 milljörðum króna. Hann kom til PSG fyrir heimsmetfé frá Barcelona árið 2017, eða 222 milljónir evra, en hefur aðeins spilað helming leikja liðsins síðan þá þar sem meiðsli hafa sett strik í reikninginn.

Ljóst er að ekki hafa mörg félög efni á að greiða Neymar laun í námunda við þau sem hann fær hjá PSG en ESPN nefnir að Chelsea hafi lengi sýnt leikmanninum áhuga.

ESPN segir að nýi samningurinn sem Mbappé gerði marki nýtt upphaf hjá PSG, þar sem Luis Campos taki við af Leonardo sem íþróttastjóri félagsins. Campos var hjá Monaco þegar Mbappé sló í gegn og liðið varð franskur meistari og komst í undanúrslit Meistaradeildar Evrópu. Campos hafði komið til Monaco fjórum árum áður. Hann verður formlega kynntur sem nýr íþróttastjóri PSG á næstunni en er þegar farinn að móta nýjan leikmannahóp, með áherslu á yngri leikmenn.