Tryggvi öflugur í fræknum sigri á Barcelona

Barcelona hefur á að skipa einu besta liði Evrópu og voru Dante Exum, Alex Abrines og Nikola Mirotic allir í liðinu í kvöld.

Börsungar tóku frumkvæðið í leiknum snemma og leiddu allt þar til í fjórða og síðasta leikhlutanum þegar Zaragoza tók öll völd á vellinum. Fór að lokum svo að Zaragoza vann fimm stiga sigur, 76-71 eftir æsispennandi lokakafla.

Tryggvi Snær spilaði rúmar sextán mínútur; skoraði ellefu stig og reif niður fjögur fráköst.

Kærkominn sigur fyrir Zaragoza sem er að berjast fyrir lífi sínu í deildinni á meðan Barcelona trónir á toppnum.