Þriggja mánaða fangelsi eftir tál­beitu­að­­­gerð: Taldi sig hafa verið að tala við fjór­tán ára stúlku

Málið má rekja til ábendingar sem lögreglan fékk um myndband sem var í dreifingu á samfélagsmiðlum í lok ágústmánaðar árið 2018. Í upphafi myndbandsins mátti sjá samskipti tveggja aðila á vefsíðunni Einkamál þar sem ákærði taldi sig hafa verið að tala við fjórtán ára stúlku.

Síðar í myndbandinu var upptaka af því þegar karlmaðurinn hugðist hitta stúlkuna, en þar beið hans karlmaður á þrítugsaldri sem tók samskiptin upp á myndband. Um var að ræða tálbeitu óbreytts borgara. Héraðsdómur Suðurlands felldi dóm í málinu í gær.

Fréttastofa fjallaði ítarlega um málið á sínum tíma en Jóhannes Gísli Eggertsson er maðurinn sem stóð á bak við tálbeituna. Hann taldi opinberar myndbirtingar af meintum afbrotamönnum réttlætanlegar: „Maður veit ekki hversu mörg börn menn gætu sært og hversu mörg börn myndu jafnvel fyrirfara sér út af einum manni,“ sagði hann í Íslandi í dag í september árið 2018.

Í samskiptunum sem fram fóru á vefsíðu Einkamáls hugðist ákærði bjóða stúlkunni í ísbíltúr. Fyrir dómi kvaðst ákærði ekki vita hvað hún væri gömul, og sagðist ekki hafa haft annan ásetning en að bjóða henni upp á ís. Samskipti þeirra hafi ekki verið í kynferðislegum tilgangi.

Hafi kynnt sig sem fjórtán ára stúlku

Við síðari skýrslutöku af ákærða hélt hann því fram að hann hefði talið að stúlkan væri að minnsta kosti átján ára gömul. Það væri enda aldurstakmarkið á stefnumótasíðunni og hann ætti að geta treyst því að fólk færi eftir skilmálum. Hann réði ekki „fantasíum annarra“ eða hvað þeir vildu segjast vera.

Borgarinn sem stóð fyrir tálbeitunni kvaðst hafa stofnað reikning á vefsíðunni og strax í upphafi kynnt sig sem fjórtán ára stúlku. Hann hélt því meðal annars fram að ákærði hafi viðhaft kynferðislega orðræðu og sent mynd af getnaðarlim sínum.

Fyrir dómi voru lögð fram gögn af samskiptum mannanna tveggja af vefsvæði Einkamáls en þar kemur fram að karlmaðurinn, sem stóð fyrir tálbeituaðgerðinni, hafi kynnt sig sem fjórtán ára stúlku.

„Ehmm…. Ég verð að byrja á því að segja þér að ég er 14 ára :P haha truflar það þig nokkuð?“ Ákærði svaraði í kjölfarið: „Nei það gerir það ekki ertu með email sem eg m afa til að tina þer ekki þegar em kemst að þvi hvað þu ert gömul?“ 

Vildi bjóða henni upp á ís

Síðar hafi ákærði viljað spjalla meira og hafi í kjölfarið spurt út í kynlíf. Hvort „stúlkan“ hafi séð getnaðarlim og sendi í kjölfarið mynd af getnaðarlim sínum. Síðar hafi hann stungið upp á því að þau hittist frekar; hann gæti boðið henni upp á ís.

Þau mæltu sér mót í kjölfarið en „stúlkan“ svaraði: „samt pabbahelgi núna þannig að ég fer í […] í kvöld.. en pabbi vinnu alltaf frá 6 á kvöldin til 8 á morgnana þannig að ég er ein heima í kvöld :D“ Ákærði kvaðst fyrir dómi hafa haldið að viðmælandinn hafi verið að atast í sér með ummælunum.

Fundur þeirra fer fram í kjölfarið á ónefndum stað þar sem umrædd myndbandsupptaka, sem fór í dreifingu á samfélagsmiðlum, var tekin upp. Ákærði hefur ávallt neitað sök í málinu og bar því við að hann hugðist hitta viðmælandann til að staðreyna aldur. Hann hefði ekki áhuga á því að hitta einstakling undir lögaldri.

Sekur um tilraun til brots gegn blygðunarsemi og barnaverndarlögum

Í dómi héraðsdóms segir að þrátt fyrir að átján ára aldurstakmark sé inn á stefnumótasíðuna hafi öll samskipti borið með sér að ákærði hafi talið sig vera fjórtán ára stúlku. Það hafi átt stoð í framburði ákærða, enda hafi hann viljað staðreyna aldur viðmælandans.

Því taldi dómari að hafið væri yfir skynsamlegan vafa að ákærði hafi gerst sekur um tilraun til brots gegn blygðunarsemi og barnaverndarlögum. Þá breytti engu hvort blygðunarsemi raunverulegs móttakanda skilaboðanna, mannsins á þrítugsaldri, hafi verið særð enda ákærði látið sér í léttu rúmi liggja hvort um væri að ræða fjórtán ára stúlku.

Við ákvörðun refsingar þótti því rétt að líta til þess að dráttur hafi verið á rannsókn málsins og ákærða ekki um það kennt. Þá hafi hann ekki hlotið refsingu áður og var refsing hæfilega ákveðin fangelsi í þrjá mánuði, en ákærði þarf ekki að sitja inni haldi hann almennt skilorð. Honum ber enn fremur að greiða rúma 1,2 milljón í sakarkostnað auk annars eins í lögmannskostnað.