ISIS-liðar stinga aftur upp kollinum í Írak og Sýrlandi

Samúel Karl Ólason skrifar 2. febrúar 2022 14:35

Búnaður ISIS-liða sem féll nýverið í bardögum í Sýrlandi. AP/SDF

Vígamenn Íslamska ríkisins stinga sífellt oftar upp kollinum í Írak og Sýrlandi. Þó samtökin séu langt frá því að ná fyrri hafa meðlimir samtakanna fyllt upp í tómarúm sem myndast hefur í norðurhluta Íraks og í Sýrlandi.

Undanfarna mánuði hefur árásum ISIS-liða fjölgað og umfang þeirra orðið meira.

„Lögreglan og herinn koma ekki hingað lengur. Ef þeir gera það, þá skjóta vígamenn á þá,“ sagði Yousif Ibrahim sem býr í bænum Jalawla í Írak við blaðamann Reuters fréttaveitunnar. Yousif segist hættur að ferðast á kvöldin vegna ISIS-liða og af ótta við að lenda í árásum þeirra en Jalawla er skammt norður af Baghdad.

Í janúar felldu ISIS-liðar ellefu hermenn í þorpi nærri Jalawla. Sama dag gerðu ISIS-liðar árás á fangelsi sem sýrlenskir Kúrdar reka í Sýrlandi og reyndu að frelsa fjölda meðlima. Minnst tvö hundruð fangar féllu í átökunum í árásinni og kjölfar hennar auk fjörutíu manna úr sveitum Kúrda, 77 fangavarða og fjögurra borgara.

Sjá einnig: Harðir bardagar eftir flótta ISIS-liða

Tæp þrjú ár eru síðan kalífadæmi Íslamska ríkisins hvarf af sjónarsviðinu. Um það leyti þegar kalífadæmið féll voru að mestu erlendir vígamenn eftir í samtökunum en meðlimir frá Írak og Sýrlandi laumuðu sér margir hverjir heim aftur og hafa haldið sig í skuggunum síðan.

Jabar Yawar, sem er háttsettur meðlimur Peshmerga-sveita Kúrda í Norður-Írak, segir ISIS-liða langt frá því að vera álíka öfluga og árið 2014, þegar þeir lögðu undir sig stóran hluta Íraks og Sýrlands. Burðir ISIS-liða sé takmarkaður og þeir njóti ekki sterkrar leiðsagnar að ofan.

Hins vegar verði samtökin til og menn tilbúnir til að ganga til liðs við þau, svo lengi sem ekki finnist lausn á pólitískum deilum mismunandi ættbálka, fylkinga og trúarhópa á svæðinu.

Sýrlenskir Kúrdar í eftirlitsferð eftir umfangsmikla árás ISIS-liða á fanelsi í Sýrlandi.AP/Baderkhan Ahmad

Íbúar og embættismenn á svæðinu sem fréttaveitan ræddi við segja slæmt öryggisástand og deilur milli þeirra aðila sem brutu kalífadæmið á bak aftur koma vera byr á vængi ISIS-liða. Sveitir á vegum Írans ráðist á sveitir Bandaríkjanna, Tyrkir ráðist á Kúrda í Írak og Sýrlandi og deilur milli ríkisstjórnar Íraks og Kúrda í norðurhluta landsins og svo megi áfram telja.

Átök og deilur séu vatn á myllu Íslamska ríkisins og skapi ástand þar sem samtökin geti þrífst, eins og þau gerðu á árum áður.

Írak Sýrland Hernaður