Sport

Íþróttamaður, lið og þjálfari ársins útnefnd í kvöld

Sindri Sverrisson skrifar
Sara Björk Gunnarsdóttir var kjörin íþróttamaður ársins í annað sinn í fyrra.
Sara Björk Gunnarsdóttir var kjörin íþróttamaður ársins í annað sinn í fyrra. mynd/Bragi Valgeirsson

Það skýrist í kvöld hvaða íþróttamaður hlýtur nafnbótina íþróttamaður ársins þegar kjörinu verður lýst í 66. sinn.

Tíu íþróttamenn koma til greina en þeir urðu efstir í kjöri íþróttafréttamanna sem skiluðu inn atkvæðaseðlum sínum rétt fyrir jól. Þrjú lið koma til greina sem lið ársins og þrír þjálfarar sem þjálfari ársins.

  • Tíu efstu í kjöri Íþróttamanns ársins 2021 í stafrófsröð:
  • Aron Pálmarsson, handboltamaður hjá Álaborg í Danmörku
  • Bjarki Már Elísson, handboltamaður hjá Lemgo í Þýskalandi
  • Júlían J. K. Jóhannsson, kraftlyftingamaður úr Ármanni
  • Kári Árnason, fótboltamaður í Víkingi R.
  • Kolbrún Þöll Þorradóttir, fimleikakona í Stjörnunni
  • Kristín Þórhallsdóttir, kraftlyftingakona úr ÍA
  • Martin Hermannsson, körfuboltamaður í Valencia á Spáni
  • Ómar Ingi Magnússon, handboltamaður í Magdeburg í Þýskalandi
  • Rut Arnfjörð Jónsdóttir, handboltakona í KA/Þór
  • Sveindís Jane Jónsdóttir, fótboltakona í Kristianstad í Svíþjóð
  • Þrjú efstu liðin í stafrófsröð:
  • Ísland, kvennalandslið í hópfimleikum
  • KA/Þór, mfl. kvenna í handbolta
  • Víkingur R., mfl. karla í fótbolta
  • Þrír efstu þjálfararnir í stafrófsröð:
  • Arnar Gunnlaugsson, þjálfari meistaraflokks karla hjá Víkingi í fótbolta
  • Vésteinn Hafsteinsson, kastþjálfari í frjálsíþróttum
  • Þórir Hergeirsson, þjálfari norska kvennalandsliðsins í handbolta

Kjörinu verður lýst við hátíðlega athöfn í beinni útsendingu á RÚV. Vegna samkomutakmarkana verður athöfnin þó lágstemmdari en ella.

Alls tóku 29 íþróttafréttamenn frá átta fjölmiðlum þátt í kjörinu í ár. Fyrir ári síðan var knattspyrnukonan Sara Björk Gunnarsdóttir valin íþróttamaður ársins en hún er ekki á meðal tíu efstu í ár enda spilaði hún lítið vegna barneigna.

Í fyrra var Elísabet Gunnarsdóttir, þjálfari kvennaliðs Kristianstad í fótbolta, valin þjálfari ársins en hún er ekki á meðal þriggja efstu nú. Kvennalandslið Íslands í fótbolta var þá valið lið ársins en kemur ekki til greina nú, en á þó einn fulltrúa í hópi tíu bestu íþróttamannanna.

Íþróttamaður ársins

Mest lesið


Fleiri fréttir

Sjá meira


×

Mest lesið